Արժույթի միջազգային հիմնադրամի տնօրեն Կրիստալինա Գեորգիևան Reuters-ին տված հարցազրույցում հայտարարել է, որ «համաշխարհային երկարատև բացասական հետևանքներ» կլինեն, եթե նույնիսկ Իրան-ԱՄՆ հակամարտությունն ավարտվի մոտ ժամանակներս։ Փոխանցում է Tass-ը:
Նրա խոսքով՝ նույնիսկ եթե հակամարտությունն արագ ավարտվի, ԱՄՀ-ի գլոբալ մակրոտնտեսական կանխատեսումները բացասական են լինելու: «Այժմ բոլոր ճանապարհները տանում են դեպի ավելի բարձր գներ և ավելի ցածր աճ: Նույնիսկ եթե պատերազմն ավարտվի այսօր, ամբողջ աշխարհը կզգա երկարատև բացասական հետևանքները», – նշել է Գեորգիևան:
Գեորգիևան ընդգծել է, որ ամենաշատը կտուժեն աղքատ և խոցելի երկրները, որոնք չունեն էներգետիկ պաշարներ: Նա նշել է, որ շատ երկրներ ունեն քիչ բյուջետային հնարավորություններ կամ ընդհանրապես չունեն դրանք, որպեսզի օգնեն իրենց քաղաքացիներին հաղթահարել պատերազմով պայմանավորված գնաճը: ԱՄՀ ղեկավարը հայտնել է, որ որոշ երկրներ դիմել են ֆինանսական օգնության համար, սակայն չի նշել դրանց անունները:
Ապրիլի սկզբին ԱՄՀ-ն, ՀԲ-ն և Միջազգային էներգետիկ գործակալությունը հայտնել էին, որ Իրանին հասցված հարվածներն արդեն իսկ հանգեցրել են զգալի գլոբալ տնտեսական հետևանքների, այդ թվում՝ հարվածել են մատակարարման շղթաներին, ավիահաղորդակցության և զբոսաշրջության ոլորտներին: Պատերազմի հետևանքները որակվել են որպես «զգալի, համաշխարհային և խիստ անհամաչափ», որոնք արտահայտվում են նավթի, գազի և պարարտանյութերի գների բարձրացմամբ:
Իրանում պատերազմի տնտեսական հետևանքների քննարկումը կենտրոնական տեղ է զբաղեցնելու նաև ԱՄՀ-ի և Համաշխարհային բանկի (ՀԲ) ղեկավար մարմինների ամենամյա գարնանային նստաշրջանում, որը կայանալու է ապրիլի 13-ից 18-ը Վաշինգտոնում:
Հետևեք մեզ տելեգրամում
