Լիբանանում Իսրայելի լայնածավալ օդային հարձակումների հետևանքով զոհերի թիվը հասել է առնվազն 254-ի, վիրավորներինը՝ գերազանցել 1100-ը։ Այս մասին հայտնում է NDTV World-ը։
Լիբանանի մայրաքաղաք Բեյրութում և երկրի այլ քաղաքներում հիվանդանոցները ծանրաբեռնված են՝ մեծ թվով տուժածներին սպասարկելու դժվարությունների պատճառով։ Շատերի վիճակը գնահատվում է ծանր, իսկ փրկարարական աշխատանքները շարունակվում են՝ փլատակների տակ մնացածներին հայտնաբերելու նպատակով։
Հարվածների այս ալիքը, որը համարվում է ամենախոշորը Լիբանանում պատերազմի սկզբից ի վեր, սկսվել է այն բանից հետո, երբ ԱՄՆ նախագահ Դոնալդ Թրամփը հայտարարել էր 15-օրյա հրադադարի և Իրանի հետ բանակցությունների մասին՝ տարածաշրջանում կայուն խաղաղություն հաստատելու նպատակով։ Սակայն հրադադարից հետո Իսրայելի վարչապետ Նեթանյահուն հայտարարել էր, որ Լիբանանը չի ներառվել այդ համաձայնության մեջ։
Ըստ հրապարակման՝ Իսրայելի պաշտպանության բանակը ներգրավել է շուրջ 50 կործանիչ, որոնք 10 րոպեի ընթացքում իրականացրել են ավելի քան 100 ավիահարված՝ թիրախավորելով «Հեզբոլլահ»-ի ենթակառուցվածքները։ Այնուամենայնիվ, բազմաթիվ հարվածներ հասցվել են նաև խիտ բնակեցված թաղամասերին՝ պատճառելով զգալի ավերածություններ։
Առաջին հարվածներից մեկը հասցվել է Սայդա քաղաքի սրճարաններից մեկին, որի հետևանքով զոհվել է առնվազն 8 մարդ, 22-ը՝ վիրավորվել։ Բաալբեկում թիրախավորվել է նաև հուղարկավորության արարողություն, ինչի հետևանքով զոհվել է առնվազն 10 մարդ։
Պակիստանի վարչապետ Շահբազ Շարիֆը, ով միջնորդել էր ԱՄՆ-ի և Իրանի միջև ձեռք բերված պայմանավորվածությանը, հայտարարել է, որ Լիբանանը ներառված է համաձայնությունում և կոչ է արել կողմերին զսպվածություն ցուցաբերել։
Լիբանանի նախագահ Ժոզեֆ Աունը դատապարտել է հարվածները՝ դրանք անվանելով «բարբարոսական» և ընդգծելով, որ դրանք խախտում են կայունության հաստատմանն ուղղված բոլոր ջանքերը։
Հետևեք մեզ տելեգրամում
