Պակիստանի վարչապետ Շահբազ Շարիֆը քառօրյա դիվանագիտական այց է սկսում Սաուդյան Արաբիա, Կատար և Թուրքիա՝ նպատակ ունենալով նպաստել Միացյալ Նահանգների և Իրանի միջև խաղաղության բանակցությունների երկրորդ փուլի կազմակերպմանը։ Հայտնում է կատարական «Ալ-Ջազիրան»:
Պակիստանի արտաքին գործերի նախարարության փոխանցմամբ՝ պաշտոնական այցերը նախատեսված են չորեքշաբթիից շաբաթ օրը, որոնց ընթացքում Սաուդյան Արաբիայում և Կատարում տեղի կունենան երկկողմ ձևաչափով հանդիպումներ։ Թուրքիայում վարչապետ Շարիֆը կմասնակցի Անթալիայի դիվանագիտական ֆորումին, որի շրջանակում նախատեսվում են բանակցություններ նախագահ Ռեջեփ Թայիփ Էրդողանի և այլ առաջնորդների հետ։
Երկշաբաթյա հրադադարի հաստատումից հետո Իրան-ԱՄՆ առաջին բանակցություններն անցկացվել էին ապրիլի 11-ին, Իսլամաբադում, սակայն կողմերին որևէ համաձայնության հասնել չէր հաջողվել:
Հետևեք մեզ տելեգրամում
