Ապրիլի 14-ին Վաշինգտոնում ԱՄՆ միջնորդությամբ Իսրայելի և Լիբանանի միջև տեղի են ունեցել ուղիղ բանակցություններ՝ Լիբանանում Թել Ավիվի շարունակվող ռազմական գործողությունների ֆոնին։ Այս մասին հայտնել է «Al Jazeera»-ն։ Դրանք առաջին նման բարձր մակարդակի շփումներն են 1993 թվականից ի վեր, սակայն կողմերի միջև խոր տարաձայնությունները նվազեցնում են շոշափելի առաջընթացի հնարավորությունը։
Բանակցությունները կայացել են ԱՄՆ պետքարտուղարությունում՝ Լիբանանի դեսպան Նադա Համադեհ Մոավադի, Իսրայելի դեսպան Եխիել Լայտերի, ԱՄՆ պետքարտուղար Մարկո Ռուբիոյի, ինչպես նաև ԱՄՆ դիվանագետների մասնակցությամբ։ ԱՄՆ-ն բանակցությունները բնութագրել է որպես «բաց, ուղիղ և բարձր մակարդակի»՝ ընդգծելով, որ Իսրայելը պատերազմում է «Հեզբոլլահ»-ի, այլ ոչ թե Լիբանանի դեմ։
Բանակցությունների ընթացքում Լիբանանը ձգտել է հասնել անհապաղ հրադադարի, դադարեցնել իսրայելական հարվածները, ապահովել տեղահանվածների վերադարձը և մեղմել խորացող հումանիտար ճգնաժամը։ Իսրայելը, իր հերթին, հրաժարվել է քննարկել հրադադարը և առաջնահերթ է համարել «Հեզբոլլահ»-ի զինաթափումը։
Քննարկվել է նաև հարավային Լիբանանում «անվտանգության գոտիների» ստեղծման տարբերակը՝ մինչև Լիտանի գետը, ինչը ենթադրում է Իսրայելի երկարաժամկետ ռազմական ներկայություն այդ տարածքներում։
Դիվանագիտական գործընթացին զուգահեռ մարտական գործողությունները շարունակվում են։ Իսրայելի հարվածների հետևանքով Լիբանանում զոհերի թիվը անցել է 2,000-ը, այդ թվում՝ երեխաներ և բուժաշխատողներ, իսկ ավելի քան 1.2 միլիոն մարդ տեղահանվել է։
«Հեզբոլլահ»-ը կտրականապես մերժել է բանակցությունները՝ դրանք որակելով որպես «անիմաստ» և «զիջում» Իսրայելին ու ԱՄՆ-ին։ Կազմակերպության առաջնորդ Քասեմ Նաիմը հայտարարել է, որ բանակցությունները նպատակ ունեն ճնշում գործադրել խմբավորման վրա՝ զենքը վայր դնելու համար։ Նրա խոսքով՝ նման քննարկումները, երբ Լիբանանը շարունակում է ենթարկվել հարվածների, հավասարազոր են «կապիտուլյացիայի»։ Խմբավորումը նաև պնդել է, որ զինաթափման հարցը ներքին լիբանանյան խնդիր է և կարող է քննարկվել միայն Իսրայելի լիակատար դուրսբերումից հետո։
Հետևեք մեզ տելեգրամում
