Վրաստանում խաղային բիզնեսի նկատմամբ վերահսկողությունը խստացվում է. տուգանքները կտրուկ կավելանան

Վրաստանի կառավարությունը հանդես է եկել օրենսդրական նոր նախաձեռնությամբ, որով նախատեսվում է խստացնել իրավական պատասխանատվությունը խաղային բիզնեսի ոլորտում և բարձրացնել թույլտվության պայմանները չկատարելու համար սահմանված տուգանքների չափերը: Ֆինանսների նախարարության կողմից պատրաստված համապատասխան օրինագիծն արդեն ներկայացվել է խորհրդարանի քննարկմանը։

Ըստ առաջարկվող փոփոխությունների՝ խաղատների կազմակերպման թույլտվություն ունեցողների, էլեկտրոնային ձևով կազմակերպվող խաղատների նկատմամբ կիրառվող տուգանքը 7 000 լարիի (2600$) փոխարեն կսահմանվի 20 000 լարի (7400$)։ Խաղային ավտոմատների սրահների կազմակերպման թույլտվություն ունեցողների համար տուգանքի չափը 1 000 լարիի (371.6 $) փոխարեն կսահմանվի 10 000 լարի (3700$) , իսկ խաղային ակումբների թույլտվություն ունեցողների համար՝ 2 000-ից 10 000 լարի։

Կառավարության պարզաբանմամբ՝ ներկայումս գործող տուգանքների չափերը չեն կատարում իրենց զսպող ֆունկցիան և չեն ապահովում պատշաճ կանխարգելում։ Գործադիր մարմինը նշում է, որ թույլտվություն ունեցողների համար հաճախ տնտեսապես ավելի ձեռնտու է խախտել թույլտվության պայմանները և վճարել սահմանված տուգանքը, քան ամբողջությամբ պահպանել օրենքով սահմանված պահանջները։ Հենց այս հանգամանքով է պայմանավորված պատժամիջոցների խստացման անհրաժեշտությունը, որպեսզի ապահովվի ոլորտի լիարժեք իրավական կարգավորումը։