Թեհրանը վերահաստատում է իր պատրաստակամությունը՝ Վաշինգտոնի հետ քննարկելու ուրանի հարստացման եղանակներն ու մակարդակը, սակայն միևնույն ժամանակ չի հրաժարվում միջուկային խաղաղ ծրագրի իր իրավունքից։ Այս մասին հայտարարել է Իրանի ԱԳՆ մամուլի խոսնակ Էսմայիլ Բաղաեին՝ ընդգծելով, որ հարստացման մակարդակի շուրջ երկխոսությունը նոր թեմա չէ, և Իսլամական Հանրապետությունը միշտ բաց է եղել քննարկումների համար՝ պայմանով, որ պետք է հաշվի առնվեն երկրի ներքին կարիքները։
Բաղաեիի խոսքով՝ միջուկային ծրագիրը շարունակում է մնալ ԱՄՆ-ի հետ բանակցությունների օրակարգի առանցքային և թերևս ամենավիճահարույց կետը, որի շուրջ կողմերը դեռևս պետք է ընդհանուր հայտարարի գան, ընդ որում՝ Թեհրանը հակադարձում է ՄԱԳԱՏԷ-ի տնօրենի որոշ հայտարարություններին՝ պնդելով, որ իրենց գործունեությունը մշտապես գտնվել է գործակալության հսկողության տակ և չի շեղվել խաղաղ նպատակներից։ Խոսելով տարածաշրջանային անվտանգության և Հորմուզի նեղուցի մասին՝ ԱԳՆ ներկայացուցիչը հայտարարել է, որ Իրանը տասնամյակներ շարունակ եղել է այս ջրային ուղու անվտանգության պահապանը, և ցանկացած անկայունություն հետևանք է ԱՄՆ-ի միջամտությունների ու «պարտադրված պատերազմի»։
Անդրադառնալով Իսլամաբադում կայացած բանակցություններին՝ Բաղաեին հայտնել է, որ իրանական կողմը ներկայացրել է 10 կետից բաղկացած փաթեթ, որը ներառում է ոչ միայն միջուկային հարցերն ու պատժամիջոցների վերացումը, այլև պատերազմի դադարեցումն ու ԱՄՆ-ի և Իսրայելի կողմից հասցված վնասների փոխհատուցումը։ Նա նշել է, որ բանակցություններում առաջընթացի համար անհրաժեշտ է փոխադարձ համաձայնություն փաթեթի բոլոր տարրերի շուրջ, քանի որ դրանք փոխկապակցված են, և Իրանը չի ընդունի միակողմանի պահանջներ կամ «թելադրանք»։
Անդրադառնալով դիվանագիտական գործընթացում Մոսկվայի ներգրավվածությանը՝ ԱԳՆ ներկայացուցիչը նշել է, որ Թեհրանը բարձր է գնահատում Ռուսաստանի աջակցության պատրաստակամությունը, սակայն հավելել է, որ հետագա քայլերը կախված կլինեն ամերիկյան կողմի հետ բանակցությունների արդյունքներից, որտեղ Պակիստանը շարունակում է մնալ միակ միջնորդը։ Այս համատեքստում Բաղաեին հաստատել է, որ Լիբանանում հրադադարի հարցը եղել է Իսլամաբադի համաձայնությունների մաս, և ԱՄՆ-ի կողմից դրա անտեսումը համարվում է պարտավորությունների դրժում։
Հետևեք մեզ տելեգրամում
