Մեծամորի ատոմակայանի շահագործման ժամկետի երկարացման ծրագրով միջոցառումներ են իրականացվում՝ ատոմակայանը հաջորդ 10 տարիների համար ևս էներգահամակարգում պահելու նպատակով: Այս մասին Ազգային ժողովում ունեցած ելույթի ժամանակ հայտնել է ՀՀ տարածքային կառավարման և ենթակառուցվածքների նախարար Դավիթ Խուդաթյանը։ Փոխանցում է «Արմենպրես» լրատվական գործակալությունը:
Նախարարը նշել է, որ անցած տարվա ընթացքում շարունակվել են Հայաստան-Իրան 400 կիլովոլտ լարման էլեկտրահաղորդման գծի և ենթակառուցվածքների ծրագրի աշխատանքները։ «Այս մասով ունենք շուրջ 85 տոկոս կատարողական»,- ասել է Խուդաթյանը։
Հայաստանը մինչև 2036 թվականը պլանավորում է նոր ատոմակայան կառուցել։ Կառավարությունը որոշել է կառուցել մոդուլային տեսակի ատոմակայան և այդ ուղղությամբ բանակցում է 5 երկրի հետ՝ ԱՄՆ, Ֆրանսիան, Ռուսաստան, Չինաստան, Հարավային Կորեա։
Հետևեք մեզ տելեգրամում
