Գերմանիայի կանցլեր Ֆրիդրիխ Մերցը հայտարարել է, որ Իրանում պատերազմի հետևանքով առաջացած վառելիքի մատակարարման խնդիրների պատճառով առաջիկայում կհրավիրվի Ազգային անվտանգության խորհրդի նիստ։ Այս մասին հայտնում է գերմանական Der Spiegel լրատվական գործակալությունը:
Կանցլերի այս որոշումը պայմանավորված է հատկապես ավիավառելիքի՝ կերոսինի սպասվող պակասուրդով, ինչը սպառնում է երկրի տնտեսական անվտանգությանը։ Մերցն իր ելույթում ընդգծել է, որ թեև այս պահին իրավիճակը դեռևս վերահսկելի է, սակայն կառավարությունը պետք է պատրաստ լինի օպերատիվ միջոցառումների, որպեսզի Գերմանիայի քաղաքացիներն ու տնտեսվարողները չբախվեն դիզվառելիքի, բենզինի կամ կերոսինի անհասանելիության խնդրին։
Ավելի վաղ փոխկանցլեր Լարս Քլինգբայլը զգուշացրել էր, որ պետք չէ սահմանափակվել միայն գների աճի դեմ պայքարով, այլ պետք է առաջնահերթ դիտարկել հենց մատակարարման անվտանգությունը։ Իրավիճակն էլ ավելի է սրվում Էներգետիկայի միջազգային գործակալության կանխատեսումների ֆոնին, ըստ որոնց՝ Եվրոպան արդեն վեց շաբաթ անց կարող է զգալ ավիավառելիքի խիստ պակաս։ Ի պատասխան այս մարտահրավերների՝ Մերցը հայտնել է, որ Գերմանիան պատրաստ է նաև միջազգային մակարդակով ներգրավվել Հորմուզի նեղուցի անվտանգության ապահովմանը և մասնակցել ականազերծման աշխատանքներին, պայմանով, որ դրա համար ստացվի ՄԱԿ-ի Անվտանգության խորհրդի համապատասխան բանաձևը և Բունդեսթագի հավանությունը։
Հետևեք մեզ տելեգրամում
