Հանրային կապերի և տեղեկատվության կենտրոնը գործարկել է «Stugel.am» հարթակը, որը նախատեսված է ապատեղեկատվության դեմ պայքարում հանրությանը աջակցելու համար։ Այն հնարավորություն է տալիս ստուգել տեքստային, լուսանկարային և տեսանյութային բովանդակությունը։
Հարթակը ներկայացրել է Հանրային կապերի և տեղեկատվության կենտրոնի տնօրեն Գոռ Ծառուկյանը՝ կենտրոնի կազմակերպած քննարկման ընթացքում։
«Ձեզ հրավիրել ենք նաև ներկայացնելու մեր կողմից պատրաստված գործիքը, որի նպատակը ոչ թե միայն մասնագիտական հանրությանը, այլ ավելի լայն հասարակությանն աջակցելն է՝ տրամադրելով հարթակ, որը հնարավորություն կտա վերիֆիկացնել և նույնականացնել կոնտենտը»,- նշել է նա։
«Stugel.am»-ը ներառում է երեք հիմնական գործիք՝ տեքստերի, լուսանկարների և տեսանյութերի վերիֆիկացիայի համար։ «Նույն կերպ, ինչպես հնարավոր է ստեղծել գեներացված լուսանկար կամ տեսանյութ, հնարավոր է նաև դրանք ստուգել՝ պարզելու համար՝ իրական են, թե ոչ»,- ասել է Ծառուկյանը։
Ծառուկյանի խոսքով՝ ապատեղեկատվության դեմ պայքարը պետք է լինի ոչ միայն արձագանքային, այլ նաև կանխարգելիչ․ «Ապատեղեկատվության դեմ պայքարը պետք է ունենա նաև հարձակողական բնույթ, որպեսզի հնարավոր լինի ոչ միայն արձագանքել, այլ նաև կանխել այն»։
Նա կարևորել է նաև մեդիագրագիտության բարձրացումը՝ ընդգծելով քաղաքացիական հասարակության հետ համագործակցությունը։ Միևնույն ժամանակ նշել է, որ հարթակի ստեղծումը նախատեսված էր ապատեղեկատվության դեմ պայքարի 2024–2026 թվականների գործողությունների ծրագրով և իրականացվել է եվրոպացի գործընկերների աջակցությամբ։
Ծառուկյանը նաև նշել է, որ տեխնոլոգիաները շարունակաբար զարգանում են, և հարթակը պետք է մշտապես թարմացվի՝ նոր ձևաչափերի ճանաչման համար։ Նրա խոսքով՝ հարթակը կլինի բաց և անվճար բոլորի համար՝ ստեղծված էստոնական ընկերության աջակցությամբ և ԵՄ ֆինանսավորմամբ, սակայն չարաշահումներից խուսափելու համար կարող են կիրառվել որոշ սահմանափակումներ։
Հետևեք մեզ տելեգրամում
