Լիբանանի վարչապետ Նավաֆ Սալամը խստորեն դատապարտել է երկրի հարավում Իսրայելի վերջին օդային հարվածները, որոնց հետևանքով զոհվել է լրագրող Ամալ Խալիլը։ Սալամն X-ի իր էջում կատարած գրառման մեջ տեղի ունեցածը որակել է որպես ռազմական հանցագործություն։ Այս մասին հայտնում է «ՌԻԱ Նովոստի»-ն։
«Լրագրողների վրա հարձակումները, փրկարարական խմբերի մուտքի արգելափակումը և փրկարարների ժամանումից հետո նույն վայրին կրկնակի հարվածները ռազմական հանցագործություններ են», – նշել է Նավաֆ Սալամը։
Սալամը ընդգծել է, որ երկրի հարավում իրենց մասնագիտական պարտականությունները կատարելիս լրագրողների նկատմամբ հարձակումներն այլևս առանձին դեպքեր չեն, այլ վերածվել են կայուն գործողությունների, որը Լիբանանը դատապարտում և մերժում է։ Նրա խոսքով՝ Բեյրութը հետամուտ է լինելու այս հարցի միջազգային քննությանը և մեղավորներին պատասխանատվության ենթարկելուն։
Հիշեցնենք, որ Լիբանանի ազգային լրատվական գործակալությունը նախօրեին հայտնել էր, որ Լիբանանի հարավում գտնվող Թայրի բնակավայրում բնակելի տան վրա ավիահարվածի հետևանքով երկու լրագրողներ վիրավորվել են։ Փրկարարները մի քանի ժամ չէին կարողացել հասնել դեպքի վայր, քանի որ շտապօգնության մեքենաների ճանապարհը երկրորդ ավիահարվածով ոչնչացվել էր, իսկ իսրայելական ուժերը փակել էին տարածքը։
Հետևեք մեզ տելեգրամում
