Ադրբեջանում Թովուզի շրջանային դատարանը 44-օրյա պատերազմի մասնակից Հաջի Վելիևին դատապարտել է երկուսուկես տարվա ազատազրկման։ Դատարանը Վելիևին մեղավոր է ճանաչել Ադրբեջանի Քրեական օրենսգրքի 221.3-րդ հոդվածով (խուլիգանություն՝ զենքի կամ որպես զենք օգտագործվող առարկաների կիրառմամբ)։ Այս մասին հայտնում են ադրբեջանական ընդդիմադիր ԶԼՄ-ները:
Վելիևը ձերբակալվել էր նախորդ տարվա մարտի 31-ին։ Ձերբակալությունից ընդամենը օրեր առաջ նա հանրայնացրել էր, թե ինչպես է ոստիկանությունը բռնություն կիրառել փողոցային առևտրով զբաղվող մի խումբ վետերանների նկատմամբ։ Բանտից ուղարկված իր ուղերձներում նա կտրականապես հերքել է առաջադրված մեղադրանքը՝ պնդելով, որ իր նկատմամբ իրականացվող հետապնդումը քաղաքական է և կապված է վետերանների նկատմամբ կառավարության կամայականությունների մասին բարձրաձայնելու հետ։
Հաջի Վելիևը ղեկավարում էր «Երիտասարդ վետերաններ» հասարակական միությունը, որի գործունեությունն այժմ դադարեցված է: Նա հանրությանը հայտնի էր դարձել մահացած զինծառայողների ընտանիքների և պատերազմի մասնակիցների խնդիրների բարձրաձայնմամբ, ինչպես նաև տեղական պաշտոնյաների հասցեին հնչեցրած սուր քննադատությամբ։
Հետևեք մեզ տելեգրամում
