ՀՀ արտաքին գործերի նախարարությունը Թուրքիայի կողմից Հայաստանի հետ երկկողմ առևտրի սահմանափակումների վերացումըգնահատել է որպես հայ-թուրքական հարաբերությունների կարգավորման գործընթացում կարևոր առաջընթաց։
ՀՀ ԱԳՆ մամուլի խոսնակ Անի Բադալյանը նշել է, որ այս որոշումը կնպաստի երկու երկրների միջև առևտրի զարգացմանը, գործարար կապերի ընդլայնմանը, ինչպես նաև տարածաշրջանային տնտեսական համագործակցության խթանմանը։ Նրա խոսքով՝ սա ևս մեկ քայլ է լիարժեք հարաբերությունների հաստատման ճանապարհին, որը հետագայում կարող է հանգեցնել սահմանի բացման և դիվանագիտական հարաբերությունների հաստատման։
Հայաստան-Թուրքիա հարաբերությունների կարգավորման գործընթացում ՀՀ ներկայացուցիչ, ԱԺ փոխնախագահ Ռուբեն Ռուբինյանն էլ ընդգծել է, որ նոր կարգավորման արդյունքում հնարավոր կլինի երրորդ երկրների միջոցով տեղափոխվող բեռների դեպքում որպես վերջնական նպատակակետ կամ ծագման երկիր նշել «Հայաստան» կամ «Թուրքիա»։ Սա նշանակում է, որ երկու երկրների միջև մաքսային առումով ուղիղ առևտուրն արդեն հնարավոր է՝ առանց լրացուցիչ վերաձևակերպումների։
Նշենք, որ ավելի վաղ Թուրքիայի ԱԳՆ-ն հայտարարել է, որ մայիսի 11-ի դրությամբ ավարտվել են Հայաստանի հետ ուղիղ առևտրի մեկնարկի համար անհրաժեշտ բոլոր նախապատրաստական և բյուրոկրատական գործընթացները։
Հետևեք մեզ տելեգրամում
