Միացյալ Նահանգները Իրանին հինգ պայման է առաջադրել խաղաղության բանակցությունների երկրորդ փուլին անցնելու համար, հաղորդում է իրանական Fars լրատվական գործակալությունը:
Ըստ լրատվամիջոցի՝ Վաշինգտոնը Թեհրանից պահանջում է հրաժարվել փոխհատուցման ցանկացած հավակնություններից, ԱՄՆ-ին փոխանցել 400 կիլոգրամ հարստացված ուրանը և միայն մեկ միջուկային համալիր աշխատեցնել:
«Բացի այդ, ամերիկյան կողմը պատրաստ չէ ապասառեցնել իրանական ակտիվների նույնիսկ 25 տոկոսը և այլ երկրներում ռազմական գործողությունների դադարեցումը կապում է բանակցությունների ընթացքի հետ: Այդ պահանջների կատարումը չի երաշխավորում, որ ԱՄՆ-ն և Իսրայելը կհրաժարվեն Իրանին նոր հարվածներ հասցնելուց»,- նշում է Fars-ը:
Ավելի վաղ Իրանը նույնպես հինգ պայման էր առաջադրել բանակցությունների վերսկսման համար: Թեհրանը պահանջում է պատերազմի դադարեցում ամբողջ տարածաշրջանում, հատկապես` Լիբանանում, պատժամիջոցների վերացում, ակտիվների ապասառեցում, վնասի փոխհատուցում և Հորմուզի նեղուցի նկատմամբ Իրանի ինքնիշխանության ճանաչում: ԱՄՆ նախագահն Իրանի առաջարկներն անընդունելի էր որակել, Թեհրանում պնդել էին, թե Դոնալդ Թրամփի արձագանքը որևէ նշանակություն չունի:
The Wall Street Journal-ի տեղեկություններով՝ կողմերի տարաձայնությունները հիմնականում Իրանի միջուկային ծրագրի շուրջ են: Վաշինգտոնը Թեհրանից պահանջում է միջուկային ենթակառուցվածքի և ուրանի պաշարների սահմանափակման պարտավորություններ ստանձնել անմիջապես , մինչդեռ Իրանն առաջարկում է այդ հարցն առանձին քննարկել 30 օրվա ընթացքում:
Հետևեք մեզ տելեգրամում
