Ուժգին հրդեհներ Կալիֆորնիայում

ԱՄՆ-ի Կալիֆորնիա նահանգում ուժգին անտառային հրդեհների պատճառով հազարավոր բնակիչների տարհանման որոշում է կայացվել։ Այս մասին հայտնում է «NBC News»-ը։

Հրդեհը բռնկվել է Լոս Անջելեսից մոտ 50 կմ հեռավորության վրա գտնվող Սիմի Վելի քաղաքի բարձունքներում։ Օրվա վերջի դրությամբ կրակը տարածվել էր ավելի քան 1300 ակր չոր բուսածածկ տարածքի վրա և վնասել առնվազն մեկ բնակելի տուն։ Տարհանման հրամաններ և նախազգուշացումներ են տրվել շուրջ 10 հազար տան բնակիչների համար՝ Սիմի Վելիում, ինչպես նաև հարակից Բել Քենիոն և Սանտա Սուսանա բնակավայրերում։ Եվս մոտ 3500 տուն գտնվում է տարհանման նախազգուշացման գոտում։

Հրդեհաշիջման աշխատանքներին ներգրավված են ուղղաթիռներ և ավիացիա, սակայն, կրակի արագ տարածմանը նպաստում են ուժգին քամին և շոգ եղանակը։ Միևնույն ժամանակ, հրշեջները պայքարում են նաև Սանտա Ռոզա կղզում բռնկված խոշոր հրդեհի դեմ, որն արդեն ընդգրկել է ավելի քան 14 հազար ակր տարածք։ Հրդեհի հետևանքով ոչնչացվել են շինություններ, իսկ ազգային պարկի 11 աշխատակից տարհանվել է։ Տուժածների մասին այս պահին տեղեկություններ չեն հաղորդվում։