Կրեմլի խոսնակ Դմիտրի Պեսկովը ճեպազրույցի ժամանակ հայտարարել է, որ Ուկրաինայում հակամարտությունը կարող է լուծվել մինչև օրվա վերջ: Դրա համար, ըստ նրա, Ուկրաինայի նախագահ Վլադիմիր Զելենսկին պետք է հրամայի երկրի զինված ուժերին լքել այն շրջանները, որոնք ՌԴ-ն որակում է որպես «ռուսական» և ձգտում է վերահսկողություն հաստատել։
«Մենք բազմիցս խոսել ենք այս մասին, և նախագահն էլ է այդ մասին ասել: Դրան հասնելու համար Զելենսկին պետք է հրամայի իր զինված ուժերին դուրս գալ Ռուսաստանի տարածքից»,- ընդգծել է Պեսկովը։
Ավելի վաղ Ուկրաինայի նախագահի գրասենյակի ղեկավար Կիրիլո Բուդանովը հայտնել էր, որ Զելենսկին պաշտոնյաներին հանձնարարել է գործադրել բոլոր ջանքերը՝ ռուս-ուկրաինական պատերազմը հնարավորինս շուտ ավարտելու համար։
Նշենք, որ որպես հրադադարի և հակամարտության անհապաղ դադարեցման նախապայման՝ Ռուսաստանը պահանջում է ուկրաինական զորքերի ամբողջական դուրսբերում այն վարչական մարզերից, որոնք Մոսկվան, որպես «ռուսական տարածաշրջաններ», պաշտոնապես ներառել է իր Սահմանադրության մեջ: Դրանք են՝ Դոնեցկի մարզը (Ռուսաստանում՝ «Դոնեցկի Ժողովրդական Հանրապետություն»), Լուգանսկի մարզը (Ռուսաստանում՝ «Լուգանսկի Ժողովրդական Հանրապետություն»), Զապորոժիեի և Խերսոնի մարզերը: Մոսկվայի պահանջը վերաբերում է այս մարզերի ամբողջական տարածքներին՝ ներառյալ այն հատվածները, օրինակ՝ Զապորոժիե և Խերսոն քաղաքները, որոնք ներկայումս վերահսկվում են Ուկրաինայի զինված ուժերի կողմից։
Հետևեք մեզ տելեգրամում
