Վրաստանի վարչապետ Իրակլի Կոբախիձեն հայտարարել է, որ ԱՄՆ-ի հետ համագործակցության և ռազմավարական գործընկերության վերականգնումը Վրաստանի կառավարության առաջնահերթ խնդիրներից է։ «ՏԱՍՍ»-ի փոխանցմամբ՝ այս մասին նշվել է նրա տարեկան զեկույցում։
«Վրաստանի կառավարության համար կարևոր և առաջնահերթ է համագործակցությունն ու ռազմավարական գործընկերությունը Միացյալ Նահանգների հետ։ Կառավարության նպատակն է հասնել ԱՄՆ-ի հետ հարաբերությունների վերագործարկմանը, ինչը ենթադրում է հավասար իրավունքների և արդարության սկզբունքի վրա հիմնված հարաբերությունների վերականգնում՝ հաշվի առնելով կողմերի շահերը բոլոր ուղղություններով», – ասվում է 2025 թվականի հունիսից մինչև 2026 թվականի մայիսն ընկած ժամանակահատվածում կառավարության ծրագրի կատարման վերաբերյալ զեկույցում, որը հրապարակվել է Վրաստանի խորհրդարանի կայքում։
Կոբախիձեն նշել է, որ Վրաստանը ակտիվ քաղաքական երկխոսություն է վարում ԱՄՆ ներկայացուցիչների հետ, իսկ Վրաստանի արտաքին գործերի նախարարությունը աշխատում է երկկողմ հարաբերությունների նոր օրակարգի ձևավորման ուղղությամբ։
Հիշեցնենք, որ Թբիլիսիի և Վաշինգտոնի հարաբերությունները զգալիորեն վատթարացել են 2024 թվականին՝ Վրաստանում «օտարերկրյա գործակալների մասին» օրենքի ընդունումից հետո։ Իսկ 2024 թվականի նոյեմբերի 28-ին Վրաստանի վարչապետի հայտարարությունից հետո, ըստ որի՝ երկիրը սառեցնում է Եվրամիությանն անդամակցության բանակցությունների մեկնարկի գործընթացը, ԱՄՆ Պետդեպարտամենտը դադարեցրեց Վրաստանի հետ ռազմավարական գործընկերությունը։
Երկկողմ հարաբերություններում որոշ ակտիվություն է նկատվել 2026-ին. փետրվարին Միլանում կայացած ձմեռային օլիմպիական խաղերի բացման արարողության շրջանակում Վրաստանի նախագահ Միխեիլ Կավելաշվիլին և փոխվարչապետ, արտաքին գործերի նախարար Մակա Բոճորիշվիլին հանդիպել են ԱՄՆ փոխնախագահ Ջեյ Դի Վենսի և պետքարտուղար Մարկո Ռուբիոյի հետ։ Փետրվար-մարտ ամիսներին Վրաստան են այցելել ԱՄՆ Կոնգրեսի և վարչակազմի մի շարք պատվիրակություններ։ Վրաստանի ԱԳՆ ներկայացուցիչներն էլ այցելել են Վաշինգտոն։ Մարտի վերջին Կոբախիձեն հեռախոսազրույց է ունեցել Մարկո Ռուբիոյի հետ։
Հետևեք մեզ տելեգրամում
