Եվրահանձնաժողովի նախագահ Ուրսուլա ֆոն դեր Լայենը հեռախոսազրույց է ունեցել ՀՀ վարչապետ Նիկոլ Փաշինյանի հետ: Քննարկվել են Ռուսաստանի կողմից Հայաստանի նկատմամբ կիրառված վերջին սահմանափակումները: Եվրահանձնաժողովի հաղորդագրության համաձայն՝ Ուրսուլա ֆոն դեր Լայենը նշել է, որ սա ոչ այլ ինչ է, քան տնտեսական հարկադրանք, և դա անընդունելի է։
«Հայկական ապրանքների արտահանման սահմանափակումները երկարաձգելով՝ Մոսկվան տնտեսական հարաբերությունները վերածում է քաղաքական ճնշման զենքի: Եվրոպան ամուր կանգնած է Հայաստանի կողքին։ Մենք պատրաստում ենք աջակցության փաթեթ: Այն ներառում է ավելի քան 50 միլիոն եվրոյի անհապաղ ֆինանսական օգնություն: Եվ դա դեռ ամենը չէ»,- նշել է Լայենը՝ հավելելով, որ կդյուրացվեն որոշ ապրանքների, մասնավորապես՝ գյուղատնտեսական արտադրանքի ներմուծումը ԵՄ շուկա:
«Վաղը նախատեսվում է Լատվիա հասցնել 10 000 ծաղկի խմբաքանակ։ Դրան կհաջորդեն մյուսները»,- ընդգծվել է հաղորդագրության մեջ:
Նշվում է, որ կողմերը կշարունակեն կապեր ստեղծել բիզնեսների միջև՝ հետևելով Հայաստան-ԵՄ վերջին գագաթնաժողովում ստանձնած պարտավորություններին։
Հետևեք մեզ տելեգրամում
