Ռուսաստանի նախագահ Վլադիմիր Պուտինը հայտարարել է, որ Հայաստանի կողմից Եվրամիությանը միանալու ձգտումը պաշտոնական օրենքով ձևակերպելը մտահոգիչ է, քանի որ դա արդեն ոչ թե պարզապես խոսակցություն է, այլ կոնկրետ իրավական քայլ։ Փոխանցում է «Ինտերֆաքս»-ը:
Այնուամենայնիվ, Պուտինը շեշտել է, որ Ռուսաստանը ցանկացած դեպքում կպահպանի նորմալ հարաբերությունները Հայաստանի հետ։ Անդրադառնալով ՀՀ վարչապետ Նիկոլ Փաշինյանի՝ ԵՄ-ին միանալու հարցով հանրաքվե անցկացնելու հայտարարությանը, Պուտինը նշել է, որ իրենք միայն մեկ խնդրանք ունեն՝ դա անել հնարավորինս արագ։ Նա հավելել է, որ որևէ հավակնություն չունեն և հարգում են ցանկացած ընտրություն:
Պուտինը շեշտել է, որ յուրաքանչյուր ինքնիշխան երկրի, այդ թվում՝ Հայաստանի իրավունքն է ընտրել իր զարգացման, տնտեսության ու սուվերենության ամրապնդման չափանիշներն ու գործընկերներին։
Միևնույն ժամանակ, ՌԴ նախագահը հիշեցրել է, որ Հայաստանը հանդիսանում է ԵԱՏՄ անդամ, իսկ Եվրամիության և ԵԱՏՄ-ի տեխնիկական կարգավորումները, գյուղատնտեսության, տրանսպորտի և լոգիստիկայի ոլորտներում չափանիշները շատ հարցերում չեն համընկնում: Նա հույս է հայտնել, որ ապագայում այդ տնտեսական ու տեխնիկական ստանդարտները երկու միություններում կհամընկնեն, սակայն ներկա պահին տեխնոլոգիապես դա անհնար է իրագործել։
Հետևեք մեզ տելեգրամում
