Համաշխարհային բանկը հավանություն է տվել Վրաստանին 372 միլիոն դոլարի վարկի տրամադրմանը՝ Տրանսկասպյան միջազգային տրանսպորտային երթուղու (Միջին միջանցք) շրջանակներում երկաթուղիների և ավտոճանապարհների արդիականացման համար: Այս մասին հայտնում է Newsgeorgia լրատվակայքը:
Վարկն ուղղվելու է երեք գլխավոր նպատակի, որոնք ներառում են Վրաստանի երկաթուղային շարժակազմի արդիականացումը, Կախեթիի մարզում նոր ավտոճանապարհների կառուցումը, ինչպես նաև տրանսպորտային համակարգի թվայնացումն ու բարեփոխումները, այդ թվում՝ խելացի համակարգերի ներդրումն ու Ավտոճանապարհների կառավարման ազգային կենտրոնի ստեղծումը։
«Այս ներդրումները կօգնեն Վրաստանին իրացնել իր ողջ ներուժը՝ որպես Եվրոպայի և Ասիայի միջև կարևոր տարանցիկ հանգույց, միաժամանակ բավարարելով Տրանսկասպյան տրանսպորտային միջանցքի աճող պահանջարկը, որը պայմանավորված է փոփոխվող համաշխարհային առևտրային հոսքերով և մատակարարման շղթաները դիվերսիֆիկացնելու անհրաժեշտությամբ», – նշել է Համաշխարհային բանկի Հարավային Կովկասի տարածաշրջանային տնօրեն Ռոլանդ Փրայսը։
Միջին միջանցքը միացնում է Եվրոպան ու Ասիան՝ շրջանցելով Ռուսաստանը: Նախագծի ընդհանուր արժեքը գերազանցում է 750 միլիոն դոլարը։ Համաշխարհային բանկի վարկից բացի, Թբիլիսին ակնկալում է ներգրավել 182 միլիոն դոլար Ասիական ենթակառուցվածքային ներդրումային բանկից և 175 միլիոն դոլար Ասիական զարգացման բանկից։
Հետևեք մեզ տելեգրամում
