Հունգարիայի կառավարությունը հունիսի 5-ից դադարեցնում է աշխատանքային վիզաների տրամադրումը Հայաստանի, Վրաստանի և Ֆիլիպինների քաղաքացիներին։ Կառավարության մամուլի քարտուղար Վանդա Սոնդիի փոխանցմամբ՝ այս քայլն առաջին փուլն է երկիր հրավիրյալ աշխատողների ներհոսքը կանոնակարգելու ճանապարհին։ Փոխանցում է Reuters-ը:
Վարչապետ Պետեր Մադյարի «Տիսա» կուսակցությունն Հունգարիայի խորհրդարանական ընտրություններում հաղթանակ էր տարել ապրիլին, ինչից հետո նոր իշխանությունները հայտարարել էին, որ հունիսից դադարեցնելու են վիզաների տրամադրումը Եվրամիության անդամ չհանդիսացող երկրների աշխատողներին։
Չնայած պաշտոնական վիճակագրության համաձայն օտարերկրյա աշխատուժը կազմում է Հունգարիայի ընդհանուր աշխատուժի ընդամենը 2%-ը, որոշ ոլորտներ, մասնավորապես՝ արտադրությունն ու ծառայությունների մատուցումը, մեծապես կախված են դրսից եկած աշխատողներից։ Հունգարիայում գործող մի շարք խոշոր օտարերկրյա ներդրողներ արդեն անհանգստություն են հայտնել, որ հրավիրյալ աշխատողների ներհոսքի լիակատար դադարեցումը կարող է հարվածել ինչպես առանձին ընկերություններին, այնպես էլ երկրի ընդհանուր տնտեսությանը։
Հետևեք մեզ տելեգրամում
