Եվրամիությունը կշարունակի աջակցել Հայաստանին և նրա ժողովրդին կարևոր բոլոր հարցերում։ Այդ մասին հայտարարել է ԵՄ արտաքին հարաբերությունների և անվտանգության քաղաքականության հարցերով գլխավոր խոսնակ Անիտա Հիպերը՝ պատասխանելով «Արմենպրես»-ի թղթակցի հարցին՝ Ռուսաստանի կողմից հայկական ապրանքների ներմուծման սահմանափակումների պայմաններում Հայաստանին ցուցաբերվող աջակցության վերաբերյալ։
Հիպերը նշել է, որ Հայաստանը սուվերեն, ժողովրդավարական և անկախ պետություն է, որն իրավունք ունի ինքնուրույն ընտրելու իր զարգացման ուղին և գործընկերներին։ Նրա խոսքով՝ Եվրամիությունը նկատում է Հայաստանի նկատմամբ Ռուսաստանի կողմից ճնշումների ուժեղացումը, այդ թվում՝ առևտրային լծակների կիրառմամբ։
«Ռուսաստանը առևտուրն օգտագործում է որպես քաղաքական ճնշման գործիք ԵԱՏՄ անդամ երկրների նկատմամբ։ Ժամանակահատվածի ընտրությունը պատահական չէ, և ակնհայտ է, որ այս կարևոր փուլում նպատակ կա վնաս հասցնել Հայաստանի տնտեսությանը»,- նշել է Հիպերը՝ ընդգծելով, որ ԵՄ-ն մնում է Հայաստանի վստահելի և հուսալի գործընկերը։
Եվրահանձնաժողովի գլխավոր խոսնակի տեղակալ Օլոֆ Ջիլը հիշեցրել է նաև Եվրահանձնաժողովի նախագահ Ուրսուլա ֆոն դեր Լայենի և ՀՀ վարչապետ Նիկոլ Փաշինյանի վերջին հեռախոսազրույցի մասին, որի ընթացքում հայտարարվել էր Հայաստանի համար լրացուցիչ աջակցության փաթեթի նախապատրաստման մասին։
Նախատեսվում է, որ այդ փաթեթի շրջանակում Հայաստանին կտրամադրվի 50 միլիոն եվրոյի աջակցություն՝ Ռուսաստանի կողմից տնտեսական ճնշումների պայմաններում երկրի դիմակայունությունը բարձրացնելու նպատակով։
Հետևեք մեզ տելեգրամում
