Հունիսի 1-ին Նախիջևանում անհայտ հանգամանքներում մահացել է Ադրբեջանի պետական սահմանապահ ծառայության զինծառայող Նաթիգ Մամեդովը: Այս մասին հայտնում են ադրբեջանական ընդդիմադիր ԶԼՄ-ները:
Զինվորի հայրը՝ Նամիգ Մամեդովը, հայտնել է, որ որդու մահվան վերաբերյալ իրենց որևէ պաշտոնական բացատրություն չի տրվել։ Նրա փոխանցմամբ՝ մահվան պատճառ կարող էր դառնալ բժշկական անփութությունը՝ ջերմությունը իջեցնելու համար արված սխալ ներարկումը։
«Որդուս 37.5 աստիճան ջերմությամբ տարել են բուժկետ, որտեղ ներարկում են արել։ Ամենայն հավանականությամբ, հակաբիոտիկի ներարկումից հետո տղաս անաֆիլակտիկ շոկ է տարել։ Դրանից հետո նրան տեղափոխել են հոսպիտալ, սակայն բժիշկներին չի հաջողվել փրկել նրա կյանքը»,- պատմել է հայրը՝ հավելելով, որ մինչ ծառայության անցնելը որդին անցել է բոլոր բժշկական քննությունները և առողջական որևէ խնդիր չի ունեցել։
Մամեդովը նշել է, որ դիակը տուն բերելու օրը ոստիկանության աշխատակիցները թույլ չեն տվել որևէ տեսանկարահանում իրականացնել. «Թույլ չտվեցին, որ նկարահանում արվի, իսկ հուղարկավորության ժամանակ հավաքեցին բոլորի հեռախոսները»։ Հայրը որդու մահվան մասին տեսանյութ է տեղադրել նաև իր TikTok-յան էջում, սակայն մի քանի ժամ անց այն հեռացվել է հարթակից։
Սա վերջին մեկ ամսվա ընթացքում Ադրբեջանի պետական սահմանապահ ծառայությունում զինծառայողի մահվան հինգերորդ դեպքն է։ Պետական գերատեսչությունները որևէ պարզաբանում չեն տարածել այս միջադեպերի վերաբերյալ։
Նշենք, որ 2026 թվականի հունվարից մինչև մայիս ընկած ժամանակահատվածում Ադրբեջանի զինված ուժերում ոչ մարտական պայմաններում մահացել է առնվազն 20 զինծառայող։
Հետևեք մեզ տելեգրամում
