Պարսից ծոցի արաբական պետությունների համագործակցության խորհրդի անդամ երկրները հայտարարել են, որ իրենց իրավունք են վերապահում դիմել հավաքական ինքնապաշտպանության և պատասխանել Իրանի կողմից իրականացվող հարձակումներին։ Այս մասին հայտնում է «ՏԱՍՍ»-ը:
Մանամայում կայացած Նախարարների խորհրդի նիստի արդյունքներով ընդունված պաշտոնական հայտարարության մեջ նշվում է, որ դաշինքի անվտանգությունն անբաժանելի է, և անդամ երկրներից որևէ մեկի դեմ իրականացված հարձակումը կդիտարկվի որպես հարձակում ամբողջ բլոկի վրա։ Միևնույն ժամանակ արաբական երկրների նախարարները հավաստիացրել են, որ իրենց հակաօդային պաշտպանության համակարգերը կատարել են իրենց խնդիրը և հաջողությամբ որսացել ու ոչնչացրել են Բահրեյնի, Քուվեյթի և Հորդանանի տարածքների ուղղությամբ արձակված իրանական հրթիռներն ու անօդաչու թռչող սարքերը։
Այս հայտարարությունը հաջորդում է տարածաշրջանում Իրանի և Միացյալ Նահանգների փոխադարձ ռազմական հարվածների հաճախակիացմանը։ ԱՄՆ զինված ուժերը երկու գիշեր շարունակ հարվածներ են հասցրել Իրանի հարավին, ինչից հետո Թեհրանը հրթիռներ է արձակել Բահրեյնում, Քուվեյթում և Հորդանանում գտնվող ամերիկյան ռազմաբազաների ուղղությամբ:
Հետևեք մեզ տելեգրամում
