Իրանի ԶՈւ «Խաթամ ալ-Անբիա» կենտրոնական շտաբը հայտարարել է, որ տարածաշրջանում ստեղծված անվտանգային իրավիճակի և Հորմոզգան նահանգի հարավային շրջանների վրա ԱՄՆ ԶՈւ հարձակումների պատճառով Հորմուզի նեղուցը պաշտոնապես հայտարարվում է փակ ցանկացած տեսակի նավերի, այդ թվում՝ տանկերների և առևտրային նավերի համար: Հայտնում են իրանական ԶԼՄ-ները:
Թեհրանը նաև հերքել է Վաշինգտոնի պնդումներն այն մասին, թե որևէ նավի հաջողվել է անցնել նեղուցով։ Իսլամական հեղափոխության պահապանների կորպուսն (ԻՀՊԿ) իր հերթին հայտարարել է, որ ի պատասխան Իրանի սահմանապահ և ոստիկանական կետերի, ինչպես նաև Բանդար Աբասի օդանավակայանի տարածքի ռմբակոծմանը, ԻՀՊԿ ռազմաօդային և ռազմածովային ուժերը երկու ալիքով հարվածել և ոչնչացրել են ԱՄՆ բանակին պատկանող 18 թիրախ:
Ըստ ԻՀՊԿ-ի՝ հարվածների են ենթարկվել Քուվեյթում գտնվող «Ալ-Սալեմ» և «Ահմադ ալ-Ջաբեր», ինչպես նաև Բահրեյնի «Շեյխ Իսա», Հորդանանի «Ալ-Ազրակ» ռազմաբազաները։ Կորպուսի պնդմամբ՝ հարվածների արդյունքում ոչնչացվել են ամերիկյան F-35, F-15 և F-16 կործանիչների տեղակայման վայրերը, ինչպես նաև մեծ քանակությամբ ինքնաթիռներ ու կարևոր ենթակառուցվածքներ:
Իրանական կողմը շեշտել է, որ իր գործողությունները կրում են «պատժիչ բնույթ» և կշարունակվեն այնքան ժամանակ, քանի դեռ ԱՄՆ-ն չի դադարեցրել իր «չարագործությունները» տարածաշրջանում։ ԱՄՆ ԶՈւ Կենտրոնական հրամանատարությունն (CENTCOM-ը) իր հերթին հայտարարել է, որ իր գործողություններն ունեն «ինքնապաշտպանական բնույթ» և պատասխան են Իրանի կողմից շարունակվող և «չհիմնավորված ագրեսիային»։
Հետևեք մեզ տելեգրամում
