Եվրոպայի խորհրդի մարդկանց առևտրի դեմ պայքարի փորձագիտական խումբը (GRETA) նոր զեկույց է հրապարակել Հայաստանի վերաբերյալ, որում գնահատել է թրաֆիքինգի զոհերի նկատմամբ արդարադատության և արդյունավետ պաշտպանության մեխանիզմների հասանելիության վիճակը։
News. am-ի փոխանցմամբ՝ փաստաթղթում նշվում է, որ 2022 թվականից ի վեր Հայաստանը մարդկանց առևտրի դեմ պայքարի ոլորտում որոշակի առաջխաղացում է արձանագրել։ Փորձագետները դրական են գնահատել տուժողներին հայտնաբերելու համակարգի կատարելագործման և նրանց անհրաժեշտ աջակցություն ցուցաբերելու ուղղությամբ ձեռնարկված միջոցառումները։
Միևնույն ժամանակ, GRETA-ն կարծում է, որ իշխանությունները պետք է ակտիվացնեն մի շարք ուղղություններով տարվող աշխատանքները։ Մասնավորապես, խոսքը վերաբերում է աշխատանքային շահագործման նպատակով կանխարգելմանը, նմանատիպ հանցագործությունների ավելի ակտիվ և ժամանակին հետաքննությանը, ինչպես նաև զոհերի հասանելիության ընդլայնման վերաբերյալ իրավաբանական օգնությանը և փոխհատուցումներին։
Զեկույցի տվյալներով՝ 2022-2025 թվականներին Հայաստանում պաշտոնապես թրաֆիքինգի զոհ է ճանաչվել շուրջ 90 մարդ, որոնցից 22-ն՝ անչափահաս։
Փորձագետներն արձանագրել են ինչպես թրաֆիքինգի բացահայտված դեպքերի, այնպես էլ այս հանցագործությունների առնչությամբ հարուցված քրեական գործերի թվի աճ։ Ընդ որում՝ տուժածների շրջանում ամենատարածվածը եղել է աշխատանքային շահագործումը։
Զեկույցում ուշադրություն է հրավիրվում նաև այն փաստին, որ ավելացել է թրաֆիքինգի զոհ դարձած օտարերկրացիների թիվը։ Խոսքը հատկապես աշխատանքային միգրանտների մասին է, որոնք վերջին շրջանում ավելի ու ավելի հաճախ են հայտնվում ռիսկային խմբում։
Չնայած իրականացված օրենսդրական բարեփոխումների դրական գնահատականին՝ GRETA-ն մի շարք հանձնարարականներ է ներկայացրել Հայաստանի իշխանություններին։ Փորձագետներն առանձնակի ուշադրություն են դարձրել երեխաներին և երիտասարդներին թրաֆիքինգի վտանգներից պաշտպանելու խնդրին։
«Հայաստանի իշխանությունները պետք է հավելյալ քայլեր ձեռնարկեն երեխաների և երիտասարդների շրջանում թրաֆիքինգի դեպքերը կանխելու համար։ Մասնավորապես, անհրաժեշտ է համապատասխան ենթաօրենսդրական ակտերի ընդունմամբ ապահովել երեխաների պաշտպանության համակարգի բարեփոխումների ամբողջական կիրառումը, ավելացնել երեխաների պաշտպանության համար պատասխանատու կառույցների ֆինանսավորումը, մշակել շահագործման դեպքերի վաղ հայտնաբերման մեխանիզմներ, ինչպես նաև խստացնել վնասակար ու արգելված մանկական աշխատանքի դեմ իրավական երաշխիքների կիրառումը»,- նշված է զեկույցում։
Մարդկանց առևտրի դեմ պայքարի փորձագիտական խումբն ընդգծել է, որ բնակչության առավել խոցելի խմբերի պաշտպանության մեխանիզմների հետագա կատարելագործումը մնում է Հայաստանում թրաֆիքինգի դեմ արդյունավետ պայքարի առանցքային պայմաններից մեկը։
Հետևեք մեզ տելեգրամում
