ԱՄՆ նախագահ Դոնալդ Թրամփը հայտարարել է, որ Իրանի հետ բանակցություններում առաջընթաց կա և իր հայտարարած «հուժկու հարվածները» տեղի չեն ունենա: Նա նշել է, որ հնարավոր է՝ առաջիկա օրերին Թեհրանի հետ համաձայնությունը ստորագրվի: Այս մասին ԱՄՆ նախագահը գրել է Truth Social-ի իր էջում:
Իրանական կողմը, սակայն, հերքել է Թրամփի պնդումները: ԱԳՆ խոսնակ Էսմայիլ Բաղաեին հայտնել է, որ հուշագիրը վերջնականացված չէ: Միաժամանակ Pars Today-ը, հղում անելով Իրանի բանակցային խմբին մոտ կանգնած իրազեկ աղբյուրին, հայտնել է, որ շուրջ երկու շաբաթ առաջ բանակցող խմբերի միջև համաձայնագրի նախագիծը գրեթե պատրաստ էր և սպասում էր Թեհրանի ու Վաշինգտոնի վերջնական հաստատմանը, սակայն Դոնալդ Թրամփը, հակառակ նախնական համաձայնության, վերջին պահին պահանջել է փաստաթղթում ներառել մի քանի նոր կետեր։ Իրանական կողմը հրաժարվել է քննարկել փոփոխված տարբերակը՝ անպատասխան թողնելով ԱՄՆ հարցումը։ Դրան հաջորդած ռազմական սրացումը սառեցրել է գործընթացը։
Լրատվամիջոցի հաղորդմամբ՝ չորեքշաբթի օրվանից գործընթացին ակտիվորեն ներգրավվել է Կատարի միջնորդական թիմը, որին հաջողվել է հասնել նրան, որ ամերիկյան կողմը հրաժարվի իր ներկայացրած լրացուցիչ պահանջներից և վերադառնա նախնական տեքստին, որը դեռևս սպասում է Իրանի պաշտոնական հավանությանը։
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել էր, որ այս գիշեր Իրանին «շատ հուժկու» հարված կհասցնեն: Մինչև այդ Իրանն ու ԱՄՆ-ն հերթական փոխադարձ հարվածներն էին հասցրել միմյանց:
Հետևեք մեզ տելեգրամում
