ՌԴ անասնաբուժական և բուսասանիտարական վերահսկողության դաշնային ծառայությունը (Ռոսսելխոզնադզոր) հայտարարել է, որ 2026 թվականի հունիսի 12-ից ամբողջությամբ սահմանափակում է Հայաստանից կարանտինային հսկողության ենթակա ապրանքների ներկրումը Ռուսաստան։ Այս մասին հայտնում է «Ինտերֆաքսը»:
Արգելքը վերաբերում է ինչպես Հայաստանում արտադրված, այնպես էլ երկրից ուղարկվող արտադրանքին։ Բացի այդ, սահմանափակվում է նաև Ռուսաստանի տարածքով այդ ապրանքների տարանցումը դեպի ԵԱՏՄ անդամ մյուս պետություններ։ Ըստ գերատեսչության՝ արգելքը կգործի այնքան ժամանակ, մինչև չմշակվի բեռների անվտանգությունն ապահովող կոնկրետ մեխանիզմ:
Ռուսական կողմը որոշումը հիմնավորում է հայկական արտադրանքում կարանտինային վնասատուների պարբերական հայտնաբերմամբ։ Ըստ Ռոսսելխոզնադզորի՝ հունիսին արձանագրվել է հայկական ընկույզի, չորացրած դեղձի և չորացրած լոլիկի՝ կապրովյան բզեզով վարակվածության երեք դեպք։
Ռոսսելխոզնադզորը պնդում է, որ սա վկայում է Հայաստանի լիազոր մարմնի կողմից անբավարար վերահսկողության մասին և անվստահություն է առաջացնում բուսասանիտարական հավաստագրման համակարգի նկատմամբ՝ վտանգելով Ռուսաստանի և ԵԱՏՄ-ի բուսասանիտարական անվտանգությունը։
Հիշեցնենք, որ վերջին շրջանում ՌԴ-ն սահմանափակել կամ լիովին արգելել է հայկական բազմաթիվ ապրանքների ներմուծումը:
Հետևեք մեզ տելեգրամում
