Հնդկաստանի արտաքին գործերի նախարարությունը Նյու Դելիում հավատարմագրված ԱՄՆ-ի գործերի ժամանակավոր հավատարմատար Ջեյսոն Միքսին հրավիրել է գերատեսչություն՝ պաշտոնական բողոք հայտնելու Օմանի ափերի մոտ առևտրային նավերի վրա իրականացված հարձակումների կապակցությամբ։ Այս մասին, «ՏԱՍՍ»-ի փոխանցմամբ, լրագրողներին հայտնել է Հնդկաստանի կառավարությունը։
Դիվանագետի կանչի համար պատճառ է հանդիսացել հերթական հարձակումը այն նավի վրա, որի անձնակազմում եղել են 20 հնդկաստանցի ծովայիններ։ Աղբյուրի խոսքով՝ սա արդեն երկրորդ դեպքն է, երբ այդ հարցի շուրջ ամերիկացի դիվանագետը հրավիրվում է Հնդկաստանի ԱԳՆ։
Նախարարությունը կոչ է արել դադարեցնել Մերձավոր Արևելքում առևտրային նավերի և քաղաքացիական ենթակառուցվածքների նկատմամբ հարձակումները, ինչպես նաև հնարավորինս արագ վերականգնել միջազգային ջրային ուղիներով ազատ և անխափան նավարկությունը։
Հիշեցնենք, որ վերջին օրերին Հորմուզի նեղուցի շրջանում հարձակման էին ենթարկվել երեք նավեր, որոնց անձնակազմերում եղել էին Հնդկաստանի քաղաքացիներ։ Հունիսի 8-ին Նյու Դելին հայտնել էր Պալաուի դրոշի ներքո նավարկող և Օմանի ափերի մոտ հարձակման ենթարկված տանկերի 24 հնդկաստանցի անձնակազմի անդամների փրկության մասին։ Հունիսի 9-ին Օմանի ծոցում ԱՄՆ զինված ուժերի հարձակման էր ենթարկվել կրկին Պալաուի դրոշով ընթացող Settebello տանկերը, որի վրա գտնվել էին 24 հնդկաստանցի ծովայիններ։ Նրանցից 21-ին հաջողվել էր փրկել, իսկ երեքը զոհվել էին։ Հունիսի 11-ին թիրախավորվել էր Գվինեայի դրոշի ներքո նավարկող «MT Jalveer» առևտրային նավը: Նավի վրա հրդեհ էր բռնկվել, սակայն անձնակազմի բոլոր 20 անդամները փրկվել էին։
Հետևեք մեզ տելեգրամում
