Էկոնոմիկայի և խաղաղության ինստիտուտը հրապարակել է 2026 թվականի Խաղաղության համաշխարհային ինդեքսը, որի համաձայն՝ Հայաստանը 163 երկրների շարքում զբաղեցրել է 51-րդ հորիզոնականը՝ ստանալով 1.825 միավոր։ Նախորդ տարվա համեմատ Հայաստանը բարելավել է իր դիրքերը 7 հորիզոնականով։ Այս մասին հայտնում է «Արմենպրես»-ը։
Զեկույցի համաձայն՝ այս ցուցանիշով Հայաստանը Հարավային Կովկասի ամենախաղաղ երկիրն է, ինչպես նաև Արևելյան Եվրոպայի և Կենտրոնական Ասիայի 15 երկրների թվում զբաղեցնում է 6-րդ տեղը՝ զիջելով միայն Բուլղարիային, Ուզբեկստանին, Ղազախստանին, Ռումինիային և Տաջիկստանին։ Երկրում խաղաղության մակարդակը գնահատվել է որպես «բարձր», ինչը պահպանվում է 2025 թվականից սկսած։ Սրան զուգահեռ՝ Ադրբեջանը զբաղեցրել է 110-րդ, իսկ Վրաստանը՝ 94-րդ հորիզոնականը։
Զեկույցի հեղինակների գնահատմամբ՝ Հայաստանի դիրքերի բարելավումը պայմանավորված է Ադրբեջանի հետ հարաբերությունների կարգավորման գործընթացով։ Փաստաթղթում նշվել է, որ երկու երկրները 2025 թվականի օգոստոսին ԱՄՆ-ում ստորագրել են խաղաղության համաձայնագիր, իսկ հետագա գործընթացները ներառում են սահմանազատման աշխատանքներ, վառելիքի մատակարարումներ և Ադրբեջանը Նախիջևանի հետ կապող տրանսպորտային ուղու կառուցում։
Ըստ զեկույցի՝ գնողունակության համարժեքության հաշվարկով Հայաստանի ռազմական ծախսերը 2025 թվականին կազմել են ՀՆԱ-ի 6,06 տոկոսը։
Վերլուծությունը ցույց է տալիս, որ Հայաստանի ընդհանուր ցուցանիշը մեկ տարվա ընթացքում բարելավվել է 4 տոկոսով։ Ամենամեծ առաջընթացը գրանցվել է «Հասարակական անվտանգություն և պաշտպանություն» բաղադրիչում՝ 9,3 տոկոս։ Այս ենթաինդեքսում բռնի ցույցերի ցուցանիշը բարելավվել է 42,9 տոկոսով, իսկ քաղաքական ահաբեկչության ցուցանիշը՝ 33,3 տոկոսով։ Միաժամանակ «Շարունակվող ներքին և միջազգային հակամարտություններ» բաղադրիչում արձանագրվել է համեստ՝ 1,8 տոկոս բարելավում։
Հետևեք մեզ տելեգրամում
