Արաբական Միացյալ Էմիրություններում արգելվել է 15 տարեկանից փոքր երեխաներին օգտվել սոցիալական ցանցերից։ Համապատասխան որոշումը կայացվել է ԱՄԷ նախարարների կաբինետի կողմից, որը գլխավորել է Դուբայի կառավարիչ, փոխնախագահ, վարչապետ և շեյխ Մոհամմեդ բին Ռաշիդ ալ Մաքթումը։
Նոր կանոնների համաձայն՝ 15 տարեկանից փոքր երեխաներին արգելվում է ստեղծել և օգտագործել անձնական հաշիվներ սոցիալական ցանցերում, ինչպես նաև օգտվել հարթակի հիմնական գործառույթներից, ներառյալ բովանդակության հրապարակումը, մեկնաբանություններ անելը, բաց խմբերին մասնակցելը։
15-ից 16 տարեկան դեռահասների համար սոցիալական ցանցերի օգտագործումը թույլատրվելու է հատուկ պաշտպանության միջոցառումների դեպքում։ Դրանք ներառում են տարիքային բովանդակության սահմանափակումներ և կներդրվեն հարթակի օգտագործման ժամանակի մոնիթորինգ և ծնողական վերահսկողության գործիքներ։
Որոշումը նաև պահանջում է, որ հարթակները ներդնեն տարիքի ստուգման մեխանիզմներ, ներառյալ թվային նույնականացումը, արհեստական բանականության տեխնոլոգիաները և կենսաչափական գործիքները։ Օգտատիրոջ տարիքի պարզապես նշումը բավարար հաստատում չի համարվի։
Ավելին, սոցիալական ցանցերին արգելվում է օգտագործել երեխաների տվյալները թիրախային գովազդի համար՝ հիմնվելով նրանց առցանց վարքագծի հետևման վրա։ Հարթակները պետք է նաև նույնականացնեն և արգելափակեն 15 տարեկանից փոքր երեխաների հաշիվները, որոնք ստեղծվել են նոր պահանջների խախտմամբ։ Սոցիալական ցանցերին տրվել է մինչև 12 ամիս անցումային ժամանակահատված՝ նոր կանոններին համապատասխանելու համար։
Հետևեք մեզ տելեգրամում
