Հորմուզի նեղուցով առևտրային նավերի երթևեկությունը վերջին օրերին աճի միտում է ցուցաբերում։ «CNN»-ի փոխանցմամբ՝ «MarineTraffic» հարթակի տվյալների համաձայն՝ վերջին 24 ժամվա ընթացքում նեղուցով անցել է առնվազն երկու տասնյակ առևտրային նավ։ Տվյալների համաձայն՝ Պարսից ծոցից դուրս են եկել ութ նավթատար և երկու բեռնատար նավ, իսկ ծոց են մուտք գործել ութ նավթատար և վեց բեռնատար նավ։
Այս ցուցանիշները, ըստ լրատվամիջոցի, վկայում են նավագնացության ակտիվության զգալի աճի մասին՝ համեմատած պատերազմի ընթացքում արձանագրված նվազ ցուցանիշների հետ։ Մինչ հակամարտության սկիզբը՝ փետրվարի վերջին, Հորմուզի նեղուցով օրական միջինը անցնում էր շուրջ 110 նավ։
Վերջին ամիսներին նեղուցում լուրջ խնդիր էր դարձել GPS համակարգերի խափանումը կամ այսպես կոչված «GPS spoofing»-ը, որի հետևանքով նավերի տեղորոշման համակարգերը սխալ տվյալներ էին փոխանցում՝ ցույց տալով դրանց գտնվելու ոչ իրական վայրերը։ Սակայն վերջին օրերին նման միջամտությունների դեպքերը զգալիորեն նվազել են, ինչը, փորձագետների գնահատմամբ, նպաստում է տարածաշրջանում ծովային փոխադրումների աստիճանական վերականգնմանը։
Հետևեք մեզ տելեգրամում
