Իրանը պատրաստ է համագործակցել Ադրբեջանի հետ գազի սվոփ փոխանակման ծրագրերի շրջանակում։ Այս մասին հայտարարել է Իրանի նավթի նախարարի տեղակալ, Իրանի Գազի ազգային ընկերության ղեկավար Սաիդ Թավաքոլլին՝ ադրբեջանական ԶԼՄ-ներին տված հարցազրույցում: Նրա խոսքով՝ եթե Ադրբեջանը համաձայնության գա տարածաշրջանի այլ երկրների հետ գազի փոխանակման հարցում, ապա Իրանը պատրաստ է ապահովել տարանցման և համագործակցության հնարավորությունները։
«Իրանի գազային ենթակառուցվածքները հնարավորություն են տալիս նման համագործակցության համար։ Այս ուղղությամբ քննարկումները շարունակվում են, և հույս կա, որ դրանք կավարտվեն գործնական քայլերով», – նշել է նա։
Թավաքոլլին ընդգծել է, որ Իրանի ազգային գազային ընկերության և Ադրբեջանի պետական նավթային ընկերության (SOCAR) միջև գոյություն ունի երկարաժամկետ համաձայնագիր, որի ժամկետը կրկին երկարացվել է։ Միաժամանակ նա նշել է, որ Թուրքմենստանի գազի փոխանակման կարճաժամկետ ծրագիրը ժամանակավորապես դադարեցվել է։ Իրանական կողմը, ըստ պաշտոնյայի, կարևորում է նաև համագործակցությունը Ռուսաստանի և Թուրքիայի հետ՝ ներառյալ գազի տեղափոխման և փոխանակման հնարավոր նախագծերը։
Թավաքոլլին նաև հայտարարել է, որ Իրանի գազային ենթակառուցվածքները վերջին ռազմական գործողությունների ընթացքում ենթարկվել են հարվածների, ինչի հետևանքով որոշ արտադրական կարողություններ սահմանափակվել են, սակայն իրավիճակը վերահսկելի է։ Նրա խոսքով՝ իրականացվում են վերականգնման աշխատանքներ, և Իրանը փորձում է ապահովել գազի կայուն մատակարարում, հատկապես ձմեռային շրջանում։
Հիշեցնենք, որ 2021թ. Աշխաբադի, Թեհրանի ու Բաքվի միջև համաձայնագիր էր ստորագրվել՝ Թուրքմենստանից Ադրբեջան սվոփ համակարգով գազ մատակարարելու վերաբերյալ: Ծրագիրը դադարեցվել է 2024-ին:
Հետևեք մեզ տելեգրամում
