Բուլղարիայի մայրաքաղաք Սոֆիայի փողոցներից մեկը պաշտոնապես կկոչվի «Հայաստան ճեմուղի»։ Այս մասին հայտնել է Բուլղարիայում ՀՀ դեսպանությունը։
Դեսպանության հայտարարության համաձայն՝ համապատասխան որոշումը Սոֆիայի քաղաքային խորհուրդն ընդունել է միաձայն՝ 33 կողմ, 0 դեմ և 0 ձեռնպահ ձայներով։
Նշվել է, որ «Հայաստան ճեմուղին» գտնվում է Սոֆիայի կենտրոնական և հեղինակավոր Պեյո Յավորով թաղամասում։
«Այս միաձայն աջակցությունը բարեկամության և փոխադարձ հարգանքի կարևոր դրսևորում է, որն արտացոլում է հայ և բուլղար ժողովուրդների միջև ձևավորված դարավոր կապերն ու ամուր բարեկամությունը»,- ասվել է հայտարարության մեջ։
Դեսպանությունից տեղեկացրել են, որ «Հայաստան ճեմուղու» պաշտոնական բացման արարողության ժամկետի վերաբերյալ լրացուցիչ տեղեկություն կհրապարակվի առաջիկայում։
Հետևեք մեզ տելեգրամում
