ԱՄՆ-ի և Իրանի միջև Շվեյցարիայում անցկացված բանակցություններից հետո կողմերը շարունակում են տարաձայնություններ ունենալ միջուկային օբյեկտների միջազգային տեսչությունների և Իրանի սառեցված ակտիվների օգտագործման հարցերում։ Այդ մասին հայտնում է «Reuters»-ը։
ԱՄՆ նախագահ Դոնալդ Թրամփը հայտարարել է, որ Իրանը համաձայնել է անսահմանափակ ժամկետով միջազգային միջուկային ստուգումների, սակայն Թեհրանը հերքել է այդ պնդումը՝ նշելով, որ բանակցություններում իր միջուկային ծրագրի շուրջ քննարկումներ չեն եղել և նման պարտավորություն չի ստանձնել։ Տարաձայնություններ կան նաև արտասահմանում սառեցված իրանական միջոցների օգտագործման շուրջ։ Թրամփի խոսքով՝ ապասառեցված միջոցները պետք է ծախսվեն ԱՄՆ-ից սննդամթերքի և դեղորայքի ձեռքբերման վրա, մինչդեռ Իրանը պնդում է, որ ինքն է որոշելու այդ միջոցների օգտագործման ուղղությունները։
Միևնույն ժամանակ, Վաշինգտոնն արդեն 60 օրով մեղմացրել է Իրանի նկատմամբ նավթային պատժամիջոցները՝ թույլ տալով Թեհրանին վաճառել նավթ և ստանալ վճարումներ դրա դիմաց։ «Reuters»-ի փոխանցմամբ՝ համաձայնագիրը նաև նախատեսում է Հորմուզի նեղուցում նավագնացության վերականգնում, Իրանի նկատմամբ պատժամիջոցների թուլացում, ինչպես նաև արտերկրում պահվող իրանական ակտիվների ապասառեցում։ Սակայն վերջնական համաձայնագրի շուրջ բանակցությունները կշարունակվեն առաջիկա 60 օրերի ընթացքում։
Անորոշ է մնում նաև Լիբանանի հարցը։ Իրանը պնդում է, որ համաձայնագիրը ենթադրում է իսրայելական զորքերի դուրսբերում Լիբանանից, մինչդեռ Իսրայելը հայտարարել է, որ շարունակելու է պահպանել անվտանգության գոտին երկրի հարավում։
Հետևեք մեզ տելեգրամում
