Լիբանանի հարավում գտնվող Տյուրոս քաղաքում իսրայելական ավիահարվածների հետևանքով զոհվել է առնվազն 60 մարդ։ Այս մասին «ՏԱՍՍ» գործակալությանը հայտնել է քաղաքի փոխքաղաքապետ Ալվան Շարաֆուդդինը։
Նրա խոսքով՝ իսրայելական ռմբակոծությունների հետևանքով ամբողջությամբ ավերվել է 24 բազմահարկ բնակելի շենք, ևս հինգը՝ մասնակի վնասվել։ Փլատակների մաքրման աշխատանքներից հետո հաստատվել է 60 խաղաղ բնակչի մահը։
Շարաֆուդդինի խոսքով՝ քաղաքի բազմաթիվ փողոցներում դեռևս տեսանելի են վերջին ավիահարվածների հետևանքները։ Նա նշել է, որ հունիսի սկզբին, իսրայելական հրամանատարության նախազգուշացումներից հետո, Տյուրոսում մնացել էր բնակչության ընդամենը 10-15 տոկոսը, իսկ հրադադարի հայտարարումից հետո վերադարձել է բնակիչների շուրջ 89 տոկոսը։ Միաժամանակ, բազմաթիվ ընտանիքներ կորցրել են իրենց բնակարանները, և քաղաքային իշխանությունները փորձում են նրանց ժամանակավոր կացարանով ապահովել։
Փոխքաղաքապետը նշել է նաև, որ քաղաքապետարանը ռազմական գործողությունների սրման սկզբից՝ մարտի 2-ից, չի դադարեցրել աշխատանքը՝ ստեղծելով ճգնաժամային շտաբ, որը զբաղվել է բնակիչների կարիքների ապահովմամբ և փրկարարական աշխատանքների համակարգմամբ։
Նրա խոսքով՝ իսրայելական ավիահարվածներից վնասվել են նաև Տյուրոսի հնագիտական պարկի՝ Էլ-Մինայի տարածքում գտնվող հնագույն հուշարձանները։ Մասնավորապես, վնասվել են առևտրային հրապարակի (ագորայի) սյուների խոյակները, իսկ պայթյունների ալիքից ճաքեր են առաջացել հռոմեական ժամանակաշրջանի մի շարք խճանկարների վրա։
Շարաֆուդդինը հիշեցրել է, որ հնագույն Տյուրոսի ավերակները, այդ թվում՝ հիպոդրոմը, ջրանցույցը, հաղթակամարը և նեկրոպոլիսը, ընդգրկված են ՅՈՒՆԵՍԿՕ-ի Համաշխարհային ժառանգության ցանկում։ Նրա գնահատմամբ՝ Իսրայելը ռազմական գործողությունների ընթացքում անտեսել է մշակութային արժեքների պաշտպանության վերաբերյալ Հաագայի կոնվենցիայի պահանջները։
Հետևեք մեզ տելեգրամում
