Եվրոպական հանձնաժողովի նախագահ Ուրսուլա ֆոն դեր Լայենը, որը պաշտոնական այցով գտնվում է Հայաստանում, ՀՀ վարչապետ Նիկոլ Փաշինյանի հետ հանդիպումից հետո հայտարարել է, որ Եվրամիությունը շարունակելու է խորացնել համագործակցությունը Հայաստանի հետ՝ տրամադրելով նոր ֆինանսական աջակցություն և ընդլայնելով հայկական արտադրանքի մուտքը եվրոպական շուկա։
Հանդիպումից հետո Նիկոլ Փաշինյանը հայտնել է, որ բանակցությունները շարունակվել են ընդլայնված կազմով՝ ընդգծելով, որ այսօրվա հանդիպումը վերահաստատել է՝ Եվրոպական միությունը Հայաստանի ամենավստահելի գործընկերներից է։
«Հայաստանը և ԵՄ-ն այսօր ավելի մոտ են իրար, քան երբևէ»,- նշել է վարչապետը։
Ուրսուլա ֆոն դեր Լայենը շնորհավորել է Փաշինյանին ընտրություններում հաղթանակի կապակցությամբ՝ ընդգծելով, որ դրանք վկայում են Հայաստանի ժողովրդավարության ամրության մասին։
«Շատ հաճելի է նորից այսքան վաղ վերադառնալ Երևան։ Կուզեի շնորհավորել ձեզ ընտրություններում հաղթանակի կապակցությամբ։ Այս ընտրությունները ևս մեկ անգամ ցույց տվեցին Հայաստանի ժողովրդավարության ամրությունը։ Թավշյա հեղափոխության ոգին կենդանի է և բարգավաճում է»,- ասել է նա։
Եվրահանձնաժողովի նախագահը նաև ընդգծել է, որ ԵՄ-ն շարունակում է աջակցել Հայաստանին։
«Ես եկել եմ ասելու, որ դուք կարող եք մեզ վրա հույս դնել»,- նշել է ֆոն դեր Լայենը։
Նրա խոսքով՝ Հայաստանը շուտով կստանա լրացուցիչ 18 մլն եվրո՝ առևտրի զարգացմանն աջակցելու նպատակով։ Այդ գումարը, ըստ նրա, հունիսի սկզբին քննարկված 52 մլն եվրոյի աջակցության փաթեթի վերջին մասն է։
Հետևեք մեզ տելեգրամում
