Թուրքիայի Հանրապետության կրթության նախարարությունը նոր ուսումնական ծրագրում փոփոխել է պատմության և աշխարհագրության դասագրքերում կիրառվող մի շարք հասկացություններ։ Թուրքական ԶԼՄ-ների փոխանցմամբ՝ այս մասին հայտարարել է Թուրքիայի ազգային կրթության նախարար Յուսուֆ Թեքինը՝ նշելով, որ դրանք նպատակ ունեն կիրառել, իր բնորոշմամբ, «ավելի ճիշտ ձևակերպումներ»։
Նոր ուսումնական ծրագրում «Հայկական հարց» տերմինը փոխարինվել է «Հայկական անհիմն պնդումներ» ձևակերպմամբ, «Կենտրոնական Ասիա» տերմինը՝ «Թուրքեստան», «Էգեյան ծով»-ը՝ «Կղզիների ծով», «Խաչակրաց արշավանքներ»-ը՝ «Խաչակրաց հարձակումներ» ձևակերպմամբ։
Բացի այդ, դասագրքերում կատարվել են նաև հետևյալ փոփոխությունները.
- «Աշխարհագրական մեծ հայտնագործություններ» – «Գաղութատիրական քաղաքականություն»,
- «Տեղահանության մասին օրենք» – «Տեղափոխման և վերաբնակեցման մասին օրենք»,
- «Բյուզանդիա» – «Արևելյան Հռոմ»,
- «Պոնտոսի հարց» – «Պոնտոսի անհիմն պնդումներ»,
- «Թուրքիայի ջրային ռեսուրսներ» – «Կապույտ հայրենիք»*,
- «Թուրքիայի օդային տարածք» – «Երկնային հայրենիք»,
- «Թուրքիայի անտառներ» – «Կանաչ հայրենիք»։
Նոր հասկացությունները ներառվել են Թուրքիայի դպրոցների նոր ուսումնական ծրագրում և աստիճանաբար կիրառվում են պատմության ու աշխարհագրության դասագրքերում։
*«Կապույտ հայրենիք» (Mavi Vatan) հայեցակարգը, որն առաջացել է դեռևս 2006 թվականին Թուրքիայի Հանրապետության ռազմածովային ուժերի հրամանատարությունում, ներկայացնում է Թուրքիայի Հանրապետության հավակնությունները շրջապատող չորս ծովերում՝ Սև, Մարմարա, Էգեյան և Միջերկրական։
Հետևեք մեզ տելեգրամում
