Անկարայում կայանալիք ՆԱՏՕ-ի գագաթնաժողովի շրջանակում հուլիսի 7-ին կհանդիպեն Թուրքիայի և ԱՄՆ նախագահներ Ռեջեփ Թայիփ Էրդողանն ու Դոնալդ Թրամփը։ Ինչպես հաղորդում է թուրքական Milliyet պարբերականը, հանդիպմանը կողմերը նախատեսում են քննարկել չորս հիմնական ուղղություններ։
Օրակարգի առաջին առանցքային բլոկը վերաբերում է պաշտպանական ոլորտում համագործակցությանը։ Մասնավորապես, կողմերը կքննարկեն թուրքական «Kaan» կործանիչների համար ԱՄՆ-ից 700 միլիոն դոլարի շարժիչների մատակարարման հարցը։ Բացի այդ, Էրդողանը մտադիր է բարձրացնել CAATSA (Ամերիկայի հակառակորդներին պատժամիջոցների միջոցով հակազդելու մասին օրենք) շրջանակներում սահմանված սահմանափակումների չեղարկման և Անկարային F-35 կործանիչների արտադրության ծրագիր վերադարձնելու հարցերը։
Երկրորդ և երրորդ ուղղությունները վերաբերում են տնտեսական գործակցությանը։ Նախագահները կհստակեցնեն երկկողմ առևտրաշրջանառությունը 100 միլիոն դոլարի հասցնելու քայլերն ու կանդրադառնան էներգետիկ ոլորտում, այդ թվում՝ ատոմային էներգետիկայի բնագավառում համատեղ նախագծերին։
Չորրորդ բլոկը ներառում է միջազգային ու տարածաշրջանային անվտանգության խնդիրները։ Էրդողանն ու Թրամփը կքննարկեն Սիրիայի վերականգնման, ինչպես նաև պաղեստինա-իսրայելական հակամարտության, ուկրաինական ճգնաժամի կարգավորման թեմաները։
Նշենք, որ Դոնալդ Թրամփը կդառնա վերջին 17 տարվա ընթացքում ԱՄՆ առաջին նախագահը, որը պաշտոնական այց կկատարի Թուրքիա։ Վերջին անգամ ԱՄՆ առաջնորդներից Անկարա է այցելել Բարաք Օբաման՝ 2009 թվականին։
Հետևեք մեզ տելեգրամում
