Պաղեստինյան «Համաս» շարժումը հայտարարել է Գազայի հատվածը շուրջ երկու տասնամյակ կառավարած մարմնի լուծարման մասին՝ ճանապարհ հարթելով քաղաքացիական կառավարման գործառույթները տեխնոկրատական կառույցին փոխանցելու համար։ Այս մասին հայտնել է «Euronews»-ը։
«Համաս»-ի կառավարության լրատվական գրասենյակի ղեկավար Իսմայիլ ալ-Թավաբթան հայտնել է, որ արտակարգ իրավիճակների կառավարության ղեկավար Մոհամմեդ ալ-Ֆարան պաշտոնապես հրաժարական է տվել, իսկ կառավարման մարմինը լուծարվել է՝ վարչական լիազորությունները Գազայի կառավարման ազգային հանձնաժողովին (NCAG) փոխանցելու նպատակով։
Գազայի կառավարման ազգային հանձնաժողովը ստեղծվել է ԱՄՆ նախագահ Դոնալդ Թրամփի նախաձեռնությամբ ձևավորված Խաղաղության խորհրդի կողմից՝ 2025 թվականի հոկտեմբերին Իսրայելի և «Համաս»-ի միջև հրադադարի համաձայնագրից հետո։
«Համաս»-ի ներկայացուցիչ Հազեմ Քասեմի խոսքով՝ շարժումը որոշել է այլևս չղեկավարել Գազայի հատվածը՝ հույս ունենալով, որ ազգային հանձնաժողովը շուտով կստանձնի կառավարման լիազորությունները։
Ավելի վաղ «Համաս»-ի ներկայացուցիչներից մեկը հայտնել էր, որ Կահիրեում կայացած հանդիպման ընթացքում շարժումն իր որոշման մասին տեղեկացրել է նաև պաղեստինյան մյուս խմբավորումներին։ Նրա խոսքով՝ մյուս խմբավորումները ողջունել են այդ քայլը՝ այն գնահատելով որպես Գազայի կառավարման նոր համակարգի ձևավորման ուղղությամբ կարևոր առաջընթաց։
Լուծարման արդյունքում Գազայի կառավարման ազգային հանձնաժողովը, որը գլխավորում է պաղեստինցի տեխնոկրատ Ալի Շաաթը, պետք է ստանձնի վարչական կառավարումը։ Սակայն հանձնաժողովը մինչ այժմ գործում է Գազայի սահմաններից դուրս, քանի որ, ըստ տեղեկությունների, Իսրայելը դեմ է եղել նրա մուտքին պատերազմից տուժած տարածք։
Հետևեք մեզ տելեգրամում
