Իրանի Իսլամական հեղափոխության պահապանների կորպուսը հուլիսի 6-ի ուշ երեկոյան առնվազն երկու հրթիռ է արձակել Հորմուզի նեղուցով անցնող առևտրային նավերի ուղղությամբ։ Այս մասին հաղորդում է Axios պարբերականը՝ հղում անելով ամերիկացի երկու պաշտոնյաների։
Հարձակման հետևանքով նավերը զգալի նյութական վնասներ են կրել, սակայն, ըստ նախնական տվյալների, զոհեր չկան։ ԱՄՆ Կենտրոնական հրամանատարությունը դեռևս պաշտոնապես չի արձագանքել միջադեպին։
The Wall Street Journal-ի փոխանցմամբ՝ թիրախավորված նավերից մեկը, ամենայն հավանականությամբ, Քաթարի «Nakilat» ընկերությանը պատկանող «Al Rekayyat» հեղուկացված բնական գազ տեղափոխող լցանավն է։
Հիշեցնենք, որ անցյալ շաբաթ Դոհայում ԱՄՆ-ի և Իրանի միջև ընթացող անուղղակի բանակցություններն ավարտվել էին առանց որևէ առաջընթացի, և կողմերին չէր հաջողվել համաձայնության գալ Հորմուզի նեղուցով անվտանգ նավարկության հարցում:
Հետևեք մեզ տելեգրամում
