Ռուսաստանյան «Ռոսատոմ» պետական կորպորացիան Հայաստանին առաջարկում է կառուցել մեծ կամ միջին հզորության նոր ատոմային էլեկտրակայան՝ երկրի էլեկտրաէներգիայի պահանջարկը բավարարելու նպատակով։ Այս մասին, «ՌԻԱ Նովոստի»-ի փոխանցմամբ, լրագրողների հետ զրույցում հայտարարել է կորպորացիայի գլխավոր տնօրեն Ալեքսեյ Լիխաչովը։
Նրա խոսքով՝ ներկայումս Հայաստանի էլեկտրաէներգիայի շուրջ 30 տոկոսն արտադրվում է ատոմային էներգետիկայի հաշվին։ Լիխաչովը նաև չի բացառել, որ առաջիկա տասնամյակներում Հայաստանում էլեկտրաէներգետիկ հզորությունների պակասը կարող է հասնել մինչև 1 գիգավատի։
«Դրան պետք է պատրաստ լինել։ Մեր առաջարկը մեծ կամ միջին հզորության ատոմային կայանն է՝ մեկ կամ երկու էներգաբլոկով, որը տասնամյակներով կծածկի սպասվող էներգետիկ դեֆիցիտը»,- ասել է «Ռոսատոմ»-ի ղեկավարը։
Նա նաև ընդգծել է, որ զարգացած ատոմային արդյունաբերության առկայությունը երկրի տնտեսության և արդյունաբերության բարձր մակարդակի կարևոր ցուցանիշներից է։
Հետևեք մեզ տելեգրամում
