Ռուսաստանը հուլիսի 6-ի վաղ առավոտյան զանգվածային հրթիռային և անօդաչու թռչող սարքերի հարձակում է իրականացրել Ուկրաինայի դեմ, որի հետևանքով զոհվել է առնվազն 22 մարդ, տասնյակ մարդիկ վիրավորվել են։ Այս մասին հայտնում է «CBC»-ն։
Ամենամեծ հարվածը հասցվել է Կիևին, որտեղ, ըստ քաղաքային ռազմական վարչակազմի ղեկավար Տիմուր Տկաչենկոյի, զոհվել է 15, վիրավորվել՝ 56 մարդ։ Կիևի մարզում ևս 7 մարդ է զոհվել, 29-ը՝ վիրավորվել։
Ուկրաինայի ռազմաօդային ուժերի տվյալներով՝ Ռուսաստանը գիշերվա ընթացքում կիրառել է հարյուրավոր անօդաչու թռչող սարքեր և տասնյակ հրթիռներ։ Արձակված 29 բալիստիկ հրթիռները հասել են իրենց թիրախներին, ինչը, ըստ ուկրաինական կողմի, պայմանավորված է Patriot հակահրթիռային համակարգերի համար նախատեսված որսացող հրթիռների սուր պակասով։
Ուկրաինայի նախագահ Վոլոդիմիր Զելենսկին հայտարարել է, որ երկրի ուժերը հաջողությամբ խոցել են անօդաչու սարքերն ու թևավոր հրթիռների զգալի մասը, սակայն բալիստիկ հրթիռների դեմ պաշտպանությունը շարունակում է մնալ անբավարար՝ համապատասխան զինամթերքի պակասի պատճառով։ Նա կոչ է արել ԱՄՆ-ին և եվրոպացի դաշնակիցներին ՆԱՏՕ-ի գագաթնաժողովում ընդունել որոշումներ, որոնք կուժեղացնեն Ուկրաինայի հակաօդային պաշտպանությունը։
ՌԴ պաշտպանության նախարարությունը հայտնել է, որ հարվածների թիրախում եղել են Կիևում գտնվող ռազմական արդյունաբերական օբյեկտներ, այդ թվում՝ անօդաչու սարքերի, զրահատեխնիկայի և հրթիռների արտադրության ձեռնարկություններ, ինչպես նաև հակաօդային պաշտպանության համակարգերի վերանորոգման և վառելիքաէներգետիկ ենթակառուցվածքների օբյեկտներ։
Միաժամանակ Ուկրաինայի զինված ուժերը հայտարարել են, որ հատուկ գործողության ընթացքում հարվածել են արևմտյան Սիբիրում գտնվող Օմսկի նավթավերամշակման գործարանին, որը երկրի խոշորագույն նավթավերամշակման ձեռնարկությունն է։ Ըստ ուկրաինական կողմի՝ սա ամենահեռավոր նավթավերամշակման գործարանն է, որին հաջողվել է հարված հասցնել պատերազմի ընթացքում։
Ռուսաստանի պաշտպանության նախարարությունն էլ հայտարարել է, որ ռուսական հակաօդային պաշտպանության համակարգերը մեկ գիշերվա ընթացքում խոցել են հարյուրավոր ուկրաինական անօդաչու թռչող սարքեր։ Միաժամանակ հաղորդվել է, որ Ղրիմում և Ռուսաստանի մի շարք շրջաններում ուկրաինական հարձակումների հետևանքով ժամանակավոր խափանումներ են արձանագրվել էլեկտրամատակարարման համակարգերում։
Հետևեք մեզ տելեգրամում
