Ուկրաինան առաջիկա օրերին Միացյալ Նահանգներից կստանա ռազմական օգնության նոր փաթեթ, որը կներառի «PAC-3» հրթիռներ՝ «Patriot» զենիթահրթիռային համալիրների համար: Այս մասին հայտարարել է Ուկրաինայի նախագահ Վլադիմիր Զելենսկին՝ նշելով, որ համապատասխան պայմանավորվածությունները ձեռք են բերվել ՆԱՏՕ-ի գագաթնաժողովի ժամանակ։ Փոխանցում է Deutsche Welle-ն:
«Ես կարծում եմ, որ սա արդյունավետ գագաթնաժողով էր Ուկրաինայի համար: Առաջիկա օրերին մենք փաթեթ կստանանք Ամերիկայի Միացյալ Նահանգներից, ինչպես նաև առանձին պայմանավորվածություններ են ձեռք բերվել եվրոպացիների հետ»,- նշել է Զելենսկին։
Ուկրաինայի նախագահը նաև հայտնել է, որ Կիևն ու Վաշինգտոնը քաղաքական համաձայնության են եկել Ուկրաինայի տարածքում «Patriot»-ի հակահրթիռների արտադրության լիցենզիա տրամադրելու շուրջ: Նրա խոսքով՝ կողմերը դեռ պետք է համաձայնեցնեն տեխնիկական մանրամասները:
Հարկ է նշել, որ բալիստիկ հրթիռների որսման համար նախատեսված «PAC-3»-ի մեկ միավորի արժեքը կազմում է շուրջ 5 միլիոն դոլար, և ներկայումս արտադրվում է միայն ԱՄՆ-ում և Ճապոնիայում:
«PAC-3» հրթիռների պակասը շարունակում է մնալ ուկրաինական հակաօդային պաշտպանության համակարգի ամենացավոտ խնդիրներից մեկը: Ավելի վաղ Ուկրաինայի պաշտպանության նախարարի խորհրդական Սերգեյ Բեսկրեստնովը հայտարարել էր, որ երկրում փաստացի սպառվել են բալիստիկ սպառնալիքների դեմ պայքարի համար նախատեսված հրթիռները:
Ուկրաինական իշխանությունների տվյալներով՝ ռուսական կողմն ակտիվորեն օգտագործում է այս իրավիճակը։ Մասնավորապես, Կիևի և Կիևի մարզի ուղղությամբ իրականացված վերջին զանգվածային հարվածներից մեկի ժամանակ ռուսական զորքերը արձակել էին 23 միավոր «Իսկանդեր-Մ» և Ս-400 բալիստիկ հրթիռներ։
Հետևեք մեզ տելեգրամում
