Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Ռուսաստանին և Հայաստանին կապում են առանձնահատուկ հարաբերություններ, որոնք հիմնված են ընդհանուր պատմության, մշակութային արժեքների և ժողովուրդների միջև ձևավորված փոխադարձ սիրո վրա: Փոխանցում է «ՏԱՍՍ» լրատվական գործակալությունը։
Զախարովայի խոսքով՝ Հայաստանի և Ռուսաստանի միջև կապերը չեն սահմանափակվում միայն միջպետական հարաբերություններով․ երկու ժողովուրդներին միավորում են բազմաթիվ համատեղ ընտանիքներ, նախագծեր, բիզնես կապեր և փոխկապակցված ճակատագրեր։
Նա ընդգծել է, որ Ռուսաստանի կողմից Հայաստանի նկատմամբ միշտ եղել են աջակցություն և օգնություն՝ պայմանավորված ոչ միայն աշխարհաքաղաքական գործոններով, այլև ժողովուրդների միջև առկա անկեղծ բարեկամությամբ և փոխադարձ վստահությամբ։
ՌԴ ԱԳՆ ներկայացուցիչը նշել է նաև, որ երկու երկրներին միավորում է հարուստ մշակութային ժառանգությունը՝ այն բնութագրելով որպես «իսկապես հսկայական աշխարհ»։
Անդրադառնալով Ռուսաստանի դերին՝ Զախարովան հայտարարել է, որ ՌԴ նախագահ Վլադիմիր Պուտինը, իր գնահատմամբ, մեծ ներդրում է ունեցել արյունալի հակամարտությունների կանխման, ինչպես նաև Հայաստանի զարգացմանն աջակցելու գործում՝ տնտեսության, էներգետիկայի, արդյունաբերության և այլ ոլորտներում՝ ընդգծելով, որ այդ մոտեցումը շարունակում է մնալ Ռուսաստանի քաղաքականության հիմքում։
Հետևեք մեզ տելեգրամում
