ԱՄՆ Զինված ուժերի Կենտրոնական հրամանատարությունը հայտարարել է, որ երկրի նախագահի հանձնարարությամբ հուլիսի 14-ից վերականգնում է Իրանի դեմ ծովային շրջափակումը, որի շրջանակում կարգելափակի նավերի մուտքն ու ելքը իրանական նավահանգիստներ:
Ամերիկյան կողմը նաև հայտնել է Իրանի դեմ ռազմական գործողությունների երրորդ ալիքի իրականացման մասին՝ թիրախավորելով իրանական ՀՕՊ համակարգերը, ափամերձ ռադարներն ու հրթիռային կայանքները:
Ամերիկյան կողմի գործողություններին ի պատասխան՝ Իրանի Իսլամական հեղափոխության պահապանների կորպուսը (ԻՀՊԿ) հարվածներ է հասցրել Բահրեյնում, Քուվեյթում և Հորդանանում տեղակայված ամերիկյան ռազմական օբյեկտներին, այդ թվում՝ ավիաբազաներին, ՀՕՊ համակարգերին, ռադարներին: Բացի այդ, ԻՀՊԿ-ն հաղորդել է Հորմուզի նեղուցում երկու տանկերի թիրախավորման մասին, որոնք, ըստ իրանական կողմի, փորձել են անցնել ականապատ ուղիով: Կառույցն ԱՄՆ-ին մեղադրել է նավերին «դեպի անօրինական երթուղիներ ուղղորդելու» մեջ:
Նշենք, որ ավելի վաղ ծովային շրջափակման վերականգնման մասին հայտնել էր նաև ԱՄՆ նախագահ Դոնալդ Թրամփը: Նա նաև ընդգծել էր, որ այսուհետ ԱՄՆ-ն հայտնի կլինի որպես «Հորմուզի նեղուցի պահապան», և նեղուցում անվտանգություն և պաշտպանություն ապահովելու դիմաց փոխադրվող ողջ բեռի 20%-ի չափով փոխհատուցում պետք է ստանա:
Հիշեցնենք, որ ԱՄՆ-ն Իրանի դեմ ծովային շրջափակում էր իրականացրել ապրիլի 13-ից հունիսի 18-ը: Այն դադարեցվել էր փոխըմբռնման հուշագրի ստորագրումից հետո:
Հետևեք մեզ տելեգրամում
