ԱՄՆ-ը նոր հարվածներ է հասցրել Իրանին։ Սա Իրանի դեմ ԱՄՆ-ի հարվածների տասներորդ անընդմեջ գիշերն է, այս մասին գրել է «BBC»-ն։
ԱՄՆ Կենտրոնական հրամանատարության հաղորդմամբ՝ թիրախավորվել են Իրանի ռազմական հրամանատարական կենտրոնները, ծովային ենթակառուցվածքները, հրթիռների և անօդաչու թռչող սարքերի արձակման կայանները, ինչպես նաև հակաօդային պաշտպանության համակարգերը։ ԱՄՆ նախագահ Դոնալդ Թրամփը հայտարարել է, որ Իրանը նախորդ գիշեր «շատ ծանր» հարվածների է ենթարկվել՝ ի պատասխան վերջերս զոհված երեք ամերիկացի զինծառայողների։ Իրանի պետական լրատվամիջոցները հայտնել են, որ ի պատասխան՝ իրանական ուժերը հարվածներ են հասցրել տարածաշրջանում գտնվող ամերիկյան ռազմական օբյեկտներին, այդ թվում՝ Բահրեյնում և Քուվեյթում։ Իրանի նախագահ Մասուդ Փեզեշքիանը հայտարարել է, որ երկիրը ԱՄՆ-ի հետ գտնվում է «մեծամասշտաբ պատերազմի» մեջ, իսկ Իրանի Իսլամական հեղափոխության պահապանների կորպուսը հայտարարել է, որ Բահրեյնում հարվածել է ամերիկյան «Ամազոն» ընկերության ենթակառուցվածքին՝ նշելով, որ թիրախավորվել է տվյալների կենտրոն։ Սակայն տեղեկությունը անկախ աղբյուրները չեն հաստատել։
Հիշեցնենք, որ իրանական կողմը հայտնել է, որ երկու նավթատար նավ վնասվել է Հորմուզի նեղուցով անցնելու փորձի ժամանակ։ Միևնույն ժամանակ, Մեծ Բրիտանիայի ծովային առևտրային գործողությունների գործակալությունը հայտնել է, որ նեղուցում նավթատար նավերից մեկը հարվածի է ենթարկվել անհայտ արկից, ինչի հետևանքով անձնակազմը լքել է նավը։ Բացի այդ,Հորդանանի բանակը հայտնել է իր տարածք արձակված երեք իրանական հրթիռի խոցման մասին, իսկ Քուվեյթի զինված ուժերը՝ իրանական անօդաչու թռչող սարքերի որսալու մասին։ Բահրեյնի իշխանությունների տվյալներով՝ իրանական ԱԹՍ-ները թիրախավորել են օդային նավագնացության համակարգերը, սակայն օդային երթևեկությունը չի խափանվել։
Չնայած ռազմական գործողությունների շարունակությանը՝ Իրանը հայտնել է, որ ԱՄՆ-ի հետ դիվանագիտական ուղերձների փոխանակումը միջնորդների միջոցով դեռ շարունակվում է։
Հետևեք մեզ տելեգրամում
