Հայաստանից հունիսի 1-ից հուլիսի 19-ը արտահանվել է 7654 տոննա ծիրան՝ ավելի քան 380 մեծ բեռնատարով։ Այս մասին «Ֆեյսբուք»-ի իր էջում գրել է ՀՀ էկոնոմիկայի նախարար Գևորգ Պապոյանը։ Նա նաև նշել է, որ հայկական ծիրանի արտահանման աշխարհագրությունը բավական լայն է, սակայն այս ընթացքում ծիրան չի արտահանվել Իսպանիա և Պորտուգալիա։
Հիշեցնենք, որ հուլիսի 20-ին «Armatmedia»-ն գրել էր, թե Հայաստանից Իսպանիա արտահանված ծիրանի խմբաքանակը ճանապարհին փչացել է և պիտանի չէ վաճառքի։ ՀՀ էկոնոմիկայի նախարարի տեղակալ Արման Խոջոյանը հերքել էր այս տեղեկությունը՝ նշելով, որ Հայաստանից Իսպանիա դեռ ծիրան չի արտահանվել։
Ռուսաստանը հունիսի 2-ից սահմանափակումներ է կիրառում Հայաստանից կորիզավոր մրգերի և խաղողի ներմուծման նկատմամբ։ Դրանից հետո Հայաստանը սկսել է ավելի ակտիվ փնտրել արտահանման նոր շուկաներ, այդ թվում՝ Եվրոպայում։
Հետևեք մեզ տելեգրամում
