Իրանի խոշորագույն «Ղեզել Հեսար» բանտի մահապատժի դատապարտված 1500 կալանավոր հացադուլ է հայտարարել՝ կարելով իրենց շուրթերը: Այս մասին հայտնում է The Guardian-ը:
Իրավապաշտպանների տվյալներով՝ բողոքի ալիքը բարձրացել է այն բանից հետո, երբ թմրանյութերի հետ կապված մեղադրանքներով դատապարտված վեց տղամարդու, հնարավոր մահապատժից առաջ, տեղափոխել են մեկուսարան:
Բանտից տարածվել է տեսանյութ, որտեղ երևում է, թե ինչպես են բանտարկյալները պահում «Ո՛չ մահապատիժներին» գրությամբ պաստառներ և վանկարկում «Եղե՛ք մեր ձայնը»:
Տեսանյութերից մեկում կալանավորներից մեկը նշում է, որ ստիպված է կարել շուրթերը, քանի որ հացադուլի վեցերորդ օրն է, իսկ բանտի ղեկավարությունից որևէ մեկը չի արձագանքել իրենց բողոքին, որից հետո կադրում երևում է, թե ինչպես է մեկ այլ բանտարկյալ ասեղով ու թելով կարում նրա շուրթերը: Մեկ այլ տեսանյութում բանտարկյալը շտապ բժշկական օգնություն է խնդրում նրանց համար, ում առողջական վիճակը վատթարանում է՝ հավելելով, որ հսկիչները չեն բացում դռները, որպեսզի հիվանդներին տեղափոխեն բուժկետ:
Հետևեք մեզ տելեգրամում
