Ռուսաստանը շահագրգռված է Հայաստանի հետ բարեկամական հարաբերությունների պահպանմամբ, իսկ Հավաքական անվտանգության պայմանագրի կազմակերպության մյուս անդամ պետություններն էլ ունեն իրենց շահերն ու պատմական կապերը Երևանի հետ։ Այդ մասին «ՌԻԱ Նովոստի»-ին տված հարցազրույցում հայտարարել է ՀԱՊԿ-ում ՌԴ մշտական ներկայացուցիչ Վիկտոր Վասիլևը։
«Մենք ցանկանում ենք պահպանել Ռուսաստանի և Հայաստանի միջև բարեկամական հարաբերությունները՝ հաշվի առնելով մեր ժողովուրդների ճակատագրերի փոխկապակցվածությունը, որը ձևավորվել է ոչ թե տասնամյակների, այլ դարերի ընթացքում։ ՀԱՊԿ մյուս անդամ պետություններն էլ ունեն իրենց շահերն ու Հայաստանի Հանրապետության հետ հարաբերությունների սեփական պատմությունը»,- ասել է Վասիլևը։
Հիշեցնենք, որ Հայաստանը 2024 թվականին սառեցրել է իր մասնակցությունը ՀԱՊԿ-ին։ Վարչապետ Նիկոլ Փաշինյանը հայտարարել էր, որ 2021-2022 թվականներին կազմակերպության անդամ պետությունները չեն կատարել Հայաստանի նկատմամբ Հավաքական անվտանգության պայմանագրով ստանձնած պարտավորությունները, ինչի պատճառով Երևանը որոշել է սառեցնել իր մասնակցությունը կազմակերպությանը։
Հետևեք մեզ տելեգրամում
