Ռուսաստանի փոխարտգործնախարար Միխայիլ Գալուզինը հայտարարել է, որ Հայաստանը մինչև այս տարվա դեկտեմբեր պետք է որոշի համազգային հանրաքվե անցկացնելու հարցը՝ ԵՄ-ին անդամակցելու վերաբերյալ։ Այս մասին նա ասել է «Tacc»-ին տված հարցազրույցում:
Գալուզինի խոսքով՝ եթե մինչև դեկտեմբեր հանրաքվե անցկացնելու հարցը չլուծվի, ԵԱՏՄ անդամ երկրների ղեկավարները դա հաշվի կառնեն Հայաստանի նկատմամբ հետագա քայլերը որոշելիս։
Նա նշել է, որ մայիսի 29-ին ԵԱՏՄ անդամ երկրների ղեկավարների համատեղ հայտարարությունում Հայաստանին կոչ էր արվում հնարավորինս կարճ ժամկետում հանրաքվե անցկացնել՝ ԵՄ-ին անդամակցելու կամ ԵԱՏՄ-ում մնալու հարցով։ Հայտարարությունում, սակայն, հանրաքվեի կոնկրետ ժամկետ չէր սահմանվել։
Հարցը կրկին քննարկվելու է դեկտեմբերին՝ ԵԱՏՄ Բարձրագույն խորհրդի նիստում։ Այդ ժամանակ, ըստ Գալուզինի, պետք է ներկայացվի նաև զեկույց՝ Հայաստանի նկատմամբ ԵԱՏՄ պայմանագրի գործողությունը կասեցնելու հնարավոր հետևանքների վերաբերյալ։
Միևնույն ժամանակ, օգոստոսի 7-ին ԵԱՏՄ միջկառավարական խորհրդի նիստում վարչապետ Նիկոլ Փաշինյանը հայտարարել էր, որ այս պահին Հայաստանում նման հանրաքվեի անցկացումը հնարավոր չէ, քանի որ չկա այդ հանրաքվեի առարկան։
«Եկեք պատկերացնենք, հիմա մենք կազմակերպում ենք հանրաքվե և ասում ենք, որ հարկավոր է կողմնորոշվել ԵՄ-ի և ԵԱՏՄ-ի միջև։ Ինչպիսի՞ն կլինի մեր քաղաքացիների ռեակցիան. նրանք կհարցնեն՝ իսկ մենք ի՞նչ հեռանկարներ ունենք ԵՄ անդամ դառնալու, իսկ ո՞րն է մեր ճանապարհային քարտեզը և այլն։ Եվ շատ հարցեր կլինեն, որոնց պատասխանները մենք չունենք, և ոչ ոք չունի»,- ասել է Նիկոլ Փաշինյանը։
Հետևեք մեզ տելեգրամում
